Jóhann Páll Jóhannsson Samfylkingu skrifaði:
Þjóðarsáttin 1990 var gerð í skugga efnahagssamdráttar, eftir viðvarandi taprekstur og gjaldþrotahrinu í stærstu atvinnugreinum. Þá var ekki mikið til skiptanna.
Nú er hins vegar blússandi hagvöxtur. Hagnaðartölurnar árin 2021 og 2022 þær hæstu á öldinni. Lesum fréttir af því hvernig eigendur stærstu útgerðarfyrirtækjanna greiða sér margfalt meiri arð heldur en fyrirtækin greiða í veiðigjöld. Meeðallaun forstjóra í Kauphöllinni eru 7 milljónir á mánuði og tekjuhæsta eina prósentið tekur til sín æ stærri hluta af þjóðarkökunni.
Á sama tíma er fjöldi heimila í miklum vanda. Hlutfall þeirra sem segjast eiga mjög erfitt með að ná endum saman hefur þrefaldast á tveimur árum samkvæmt kjarakönnun Gallup og æ fleiri heimili eru rekin á yfirdrætti.
Ef það á að nást einhver þjóðarsátt verður það að vera þjóðarsátt um réttlátari skiptingu gæðanna og réttlátari skiptingu byrðanna.