Jóhann Þorvarðarson skrifar:
Þrátt fyrir blíðmælgi á báða bóga þá tel ég að kjósendur meti hlutina samt á þann hátt að Helgu Völu var bolað til hliðar. Frami hennar var stöðvaður og hún minnkuð.
Það er dapurt til þess að hugsa að jafn einarður og upplitsdjarfur þingmaður og Helga Vala Helgadóttir sjái þann kost vænstan að hætta á Alþingi þegar sterkur byr er í segl Samfylkingarinnar. Hún er að eigin sögn Evrópu- og evrusinni enda veit hún sem er að mannréttindi, jöfnuður og stöðugleiki er hvergi meiri í heiminum en akkúrat í Evrópu. Þrátt fyrir smjaðurmæli bæði Helgu Völu og Kristrúnar um að allt sé í góðu gert þá verður ekki horft fram hjá þeirri staðreynd að Helga Vala var sett af sem formaður þingflokks Samfylkingarinnar strax eftir að Kristrún var kosin formaður. Slík framkoma situr auðvitað í Helgu Völu eins og myndi gera með alla metnaðarfulla stjórnmálamenn.
Helga Vala náði prýðilegum árangri í síðustu kosningum þó fylkingin hafi ekki náð nema tæplega 10 prósenta fylgi á landsvísu. Hægri hönd Kristrúnar náði til dæmis inn á þing sem jöfnunarþingmaður, en þar á ég við Jóhann Pál Jóhannsson. Ég efast um að hann hefði sjálfur náð sama árangri og Helga hefði hann verið í fyrsta sæti. Samt lætur hann eins og að hann og Kristrún eigi Samfylkinguna skuldlaust. Það er öðru nær. Ég tel að hér muni hið fornkveðna eiga við um að þú veist ekki hvað átt hefur fyrr en misst hefur.
Menn geta síðan velt því fyrir sér hvaða vit var í því að skipta Helgu Völu út fyrir Loga Einarsson. Hann á í hinum mestu vandræðum fyrir norðan enda fylgi Samfylkingarinnar dapurt á þeim slóðum. Þarna var verið að skipta út aflakonu fyrir karl sem kemur með tómlegar lestar í land enda glymur í stálþiljum þegar gólað er niður í lestar norðanfarsins. Telji valdhafar innan Samfylkingarinnar að Dagur B. Eggertsson muni gera betur en Helga Vala þá ofmetur fólkið fylgilag kjósenda í Reykjavík við borgarstjórann. Fylgið reytist af honum með hverri nýrri kosningu. Fram hjá því er ekki hægt að horfa enda ára hans þreytuleg.
Logi Einarsson átti bara að sjá sóma sinn í því að vera óbreyttur þingmaður…
Ég ákvað að sækja einn hverfafund þegar Kristrún var á hringferð um landið og spurði hana beint út hver hennar afstaða væri til aðildar að Evrópusambandinu og upptöku evrunnar. Svar hennar var langt en samt afskaplega klént. Og það olli vonbrigðum. Í grunninn þá sagði hún að Evrópu- og evrumál væru ekki í forgrunni heldur velferðarmál af ýmsum toga. Skekkjan í svari Kristrúnar er að ekkert eitt mál eflir velferðina, jöfnuðinn og stöðugleikann eins mikið og upptaka evrunnar. Að Kristrún skuli jaðarsetja þetta stefnumál mun koma í bakið á henni þegar nær dregur kosningum og hveitibrauðsdagarnir verða uppurnir.
Þrátt fyrir blíðmælgi á báða bóga þá tel ég að kjósendur meti hlutina samt á þann hátt að Helgu Völu var bolað til hliðar. Frami hennar var stöðvaður og hún minnkuð. Logi Einarsson átti bara að sjá sóma sinn í því að vera óbreyttur þingmaður og einbeita sér að fylgisleysinu fyrir norðan.