Stjórnarráðið: Úthlutunarnefnd um úthlutun rekstrarstuðnings til einkarekinna fjölmiðla hefur lokið störfum í ár. Úthlutunarnefnd skipa Anna Mjöll Karlsdóttir lögfræðingur (formaður), samkvæmt tilnefningu Hæstaréttar Íslands, Gunnar Þór Tómasson löggiltur endurskoðandi, samkvæmt tilnefningu Ríkisendurskoðunar og Jón Gunnar Ólafsson, lektor við Háskóla Íslands, samkvæmt tilnefningu samstarfsnefndar háskólastigsins. Fjölmiðlanefnd sá um umsýslu umsókna og veitti úthlutunarnefnd sérfræðiaðstoð vegna þeirra. Alls bárust 30 umsóknir um rekstrarstuðning til einkarekinna fjölmiðla innan umsóknarfrests þar sem samtals var sótt um 1.000.220.781 kr. Til úthlutunar voru 550.000.000 kr. að frádregnum kostnaði vegna umsýslu, auglýsinga, þóknunar fyrir störf úthlutunarnefndar o.fl. sem var um 1,09% af heildarfjárhæð eða 5.979.027 kr. Til úthlutunar voru því 544.020.973 kr.
Fyrr í mánuðinum var tilkynnt um rekstrarstuðning til einkarekinna fjölmiðla utan höfuðborgarsvæðisins. Sjá nánar hér. Umsókn frá einum umsækjanda, Bændasamtökum Íslands, var vísað frá á grundvelli 5. mgr. 62. gr. i laga um fjölmiðla, eins og þeim var breytt með lögum nr. 66/2025, þar sem umsókn barst að umsóknarfresti liðnum og ekki var sýnt fram á gildar ástæður fyrir töfunum. Þá var umsóknum frá Kaffinu fjölmiðli ehf. og Spássíu ehf. hafnað þar sem þær uppfylltu ekki skilyrði 62. gr. g laga um fjölmiðla nr. 38/2011, eins og þeim var breytt með lögum nr. 66/2025. Samkvæmt ákvörðun úthlutunarnefndar hljóta 28 fjölmiðlaveitur rekstrarstuðning árið 2025:
- Árvakur hf. 103.905.866 kr.
- Birtingur útgáfufélag ehf. 11.412.717 kr.
- Brotkast ehf. 7.296.558 kr.
- Eigin herra ehf. 7.096.346 kr. (akureyri.net)
- Elísa Guðrún ehf. 6.544.050 kr.
- Eyjasýn ehf. 3.608.423 kr.
- Farteski útgáfufélag ehf. 5.759.018 kr.
- Fjölmiðlatorgið ehf. 38.854.610 kr.
- Fótbolti ehf. 11.518.761 kr.
- Fröken ehf. 12.986.765 kr.
- Hönnunarhúsið ehf. 1.573.081 kr.
- Iceland Review ehf. 14.785.571 kr.
- Leturstofan Vestmannaeyjum ehf. 8.569.702 kr.
- Mosfellingur ehf. 2.057.440 kr.
- Myllusetur ehf. 42.424.679 kr.
- Nýprent ehf. 5.125.032 kr.
- Prentmet Oddi ehf. 5.209.703 kr.
- SagaNet – Útvarp Saga ehf. 8.369.710 kr.
- Sameinaða útgáfufélagið ehf. 77.699.850 kr. (Heimildin og Mannlíf).
- Samstöðin ehf. 11.571.060 kr.
- Skessuhorn ehf. 16.599.863 kr.
- Skrautás ehf. 2.035.388 kr.
- Steinprent ehf. 4.301.743 kr.
- Sýn hf. 103.905.866 kr.
- Tunnan prentþjónusta ehf. 2.882.329 kr.
- Útgáfufélag Austurlands ehf. 7.348.817 kr.
- Útgáfufélagið ehf. 7.402.678 kr.
- Víkurfréttir ehf. 13.175.346 kr.
Þessi úthlutun er hluti af framlengingu á styrkjakerfi fyrir einkarekna fjölmiðla sem Alþingi samþykkti að framlengja út árið 2025. Menningar-, nýsköpunar- og háskólaráðherra hefur boðað breytingar og viðbætur við styrkjakerfið sem verða innleiddar í áföngum. Sjá nánar hér.