Samfélag „Ríkisstjórn Íslands er hvött til að beita sér fyrir því að vestnorræn söngbók verði gefin út með lögum á þjóðtungum landanna þriggja,“ segir í þingsályktun sem lögð hefur verið fram á Alþingi, að tilstuðlan Vestnorræna ráðsins, sem er samstarfsvettvangur Íslands, Færeyja og Grænlands.
„Fyrsta skrefið í þessa átt væri að setja á fót vinnuhóp fagfólks frá löndunum þremur sem myndu velja lögin og útsetja þau með nótum. Fjármögnun vinnuhópsins ætti að ná yfir útgáfu söngbókarinnar í löndunum þremur auk greiðslna höfundarréttarlauna listamanna. Vestnorræna ráðið hefur í gegnum árin safnað 90 lögum frá löndunum þremur og gæti það safn nýst vinnuhópnum,“ segir einnig um þetta mál.