Jóhann Þorvarðarson skrifar:
Svo þetta þegar Björn var sjálfur forstjóri spítalans og hann setti niðurskurðarkröfur á aðra starfsmenn þá heimtaði hann risavaxna kauphækkun fyrir sjálfan og fékk.
Björn Zoëga sendir starfsfólki Landsspítalans yfirgengileg skilaboð í viðtali á Bylgjunni. Talar um að fólkið sé neikvætt, geri of mikið úr vandanum. Og að peningar væru ekki alltaf lausnin. Hann er að setja sjálfan sig á áður óséðan háhest gagnvart fólki sem hefur verið afar lausnarmiðað allar götur frá því vinirnir hans Björns hjá Samtökum atvinnulífsins settu þjóðfélagið á hliðina árið 2008. Hugsandi og harðduglegt heilbrigðisstarfsfólkið hefur síðan sýnt það enn og aftur í faraldrinum hversu megnugt það er. Lausnarmiðað og jákvætt gagnvart því að leysa öll vandamál.
Þetta með að peningar væru ekki alltaf lausnin er áhugavert. Björn ætti að beina þessu að Tómasi Guðbjartssyni hjartalækni og sjúklingum hans sem ekki komast í nauðsynlegar aðgerðir vegna viðvarandi fjárskorts. Vanfjármögnun sem kristallast núna í heimsfaraldrinum. Svo þetta þegar Björn var sjálfur forstjóri spítalans og hann setti niðurskurðarkröfur á aðra starfsmenn þá heimtaði hann risavaxna kauphækkun fyrir sjálfan og fékk. Grjótið og glerhúsið tekur á sig ýmsar kynjamyndir.
Að Willum Þór heilbrigðisráðherra líki Birni við Lionel Messi er móðgun við brosandi knattspyrnugoðið og áfellisdómur yfir Willum. Efast verður strax á upphafsdögum um getu hans til að sinna starfi heilbrigðisráðherra.