Eftir að Bjarni Benediktsson og allt það fólk, fyrirtæki, fjölmiðlar og önnur fyrirbæri sem hann hefur tangarhald á hafa reynt allt til að splundra samstöðu launafólks án nokkurs árangurs, náði Bjarni í það sem hann eflaust ímyndar sér sem gjöreyðingarvopn í baráttunni, það er sjálfa ríkisstjórn Íslands. Þar er engin fyrirstaða við framgöngu Bjarna.
Bjarni og bakland hans eru þeirrar skoðunar að stoppa verði nýja forystu launafólks. Eðlilega kann hann ekki að meta nýja fólkið. Það talar gegn hagsmunum Bjarna og hans fólks. Þau ógna stöugleika þeirra ríkustu. Með illu skal illt út reka.
Það er ekki lítið að ráða yfir fjármálaráðuneytinu og ríkisstjórn Íslands. Augljós barátta hefur litlu eða engu skilað til þessa. Hér eftir verða vopnin ekki spöruð. Allt mun verða gert til að þau verst settu skerði ekki afkomu þeirra ríkustu. Allt. Allt til að hræða fólk í von um að það veiki nýja forystu verkalýðsfélaga.
Á ruv.is má lesa þetta: Bjarni Benediktsson fjármálaráðherra segir að stjórnvöld ætli ekki að sitja aðgerðarlaus hjá ef launahækkanir í komandi kjarasamningum leiða til aukinnar þenslu og verðbólgu. Ekki komi til greina að lækka skatta í því umhverfi og hella þannig olíu á eldinn.
„Ef menn eru ósáttir við það að stjórnvöld muni bregðast við ef kjaralotan fer úr böndunum þá veit ég ekki við hverju menn bjuggust af þessari ríkisstjórn. Hún mun ekki skilja Seðlabankann eftir einan með það hlutverk að bregðast við,“ segir Bjarni á ruv.is.
Bjarni er óskoraður foringi síns hóps og sinnar ríkisstjórnar. Forystufólk Vinstri grænna á bágt þessa dagana meðan Bjarni fer sínu fram. Rifjuð eru upp, til þess að gera nýleg, ummæli forystufólk flokksins, þar sem þau létu sem þau bæru hagsmuni hinnar verr settu fyrir brjósti. Sem nú sannast að var eins fjarri og hugsast getur.