Schengen-samstarfið er lykilverkfæri fyrir löggæsluna
Alþingi: Að ósk Snorra Mássonar, var sérstök umræða um Shengen-samstarfið á Alþingi. Ákvörðun Spánverja að hleypa allt að 500 þúsund manns inn á Shengensvæðið, féll í grýttan jarðveg. Við byrjum hins vegar í seinni ræðu Snorra Mássonar:
„Við erum þrátt fyrir allt að tala um þennan trausta ramma Schengen-samstarfsins og þegar menn sveigja hann og teygja, eins og má alveg færa rök fyrir að þessi ákvörðun Spánverja vinni í átt að, þá ættu menn að hringja ákveðnum viðvörunarbjöllum og segja að þetta sé kannski ekki æskileg nálgun fram á við, þó að maður þurfi ekkert að fara að deila um einstakar ákvarðanir, bara koma sjónarmiðum á framfæri.
Mér finnst mikilvægt að við sofnum ekki á verðinum hér og einhvern veginn leyfum þessum breytingum öllum úti í heimi, hvort sem er í Schengen-samstarfinu eða Evrópusambandinu eða annars staðar, að valta yfir okkur Íslendinga án þess að við fáum rönd við reist. Stríðsbrölt Bandaríkjamanna og Ísraelsmanna núna mun örugglega hafa í för með sér enn aðra flóttamannabylgju til Evrópu og þá verður Ísland að standa í lappirnar og koma sínu regluverki í þannig skorður að við missum þau mál ekki úr höndunum eins og átök á fyrri stigum, eins og útlendingaregluverkið hefur verið frá 2015, 2016, hafa nú stundum leitt til. Það er mjög mikilvægt að við séum vakandi fyrir þessu og nýtum okkar rödd eins og við hugsanlega getum.“
Þorbjörg Sigríður Gunnlaugsdóttir dómsmálaráðherra sagði
„Stefna mín og ríkisstjórnarinnar felst hins vegar ekki í því að ætla að loka landamærum eða standa gegn eðlilegum hreyfanleika fólks heldur að tryggja að við séum með skýrar og ábyrgar reglur um rétt til dvalar hér á landi. Í því samhengi sem háttvirtur þingmaður nefnir hér má líka velta fyrir sér hvernig aðgengi er að ferðaskilríkjum í kjölfar svona mála. En við viljum hreyfanleika til að skapa greiða og gagnsæja leið fyrir hæfileikaríkt fólk, fyrir sérfræðinga, fyrir atvinnulífið til að starfa hér á landi þegar þörf er fyrir slíka þekkingu í íslensku samfélagi.
Ég er mjög hlynnt Schengen-samstarfinu. Ég held að það sé lykilverkfæri fyrir löggæsluna. Ég er líka hlynnt áframhaldandi veru okkar í EES því ég man þegar við ræddum dvalarleyfi hér síðast í þessum þingsal, við háttvirtur þingmaður, þá kom fram af hálfu varaformanns Miðflokksins að hann væri tilbúinn til að skoða það alvarlega að jafnvel stíga það skref að fara úr EES-samstarfinu. Hér erum við bara ósammála. EES-samstarfið er alger grundvallarstoð og alger lykilforsenda fyrir íslenskt efnahagslíf, íslenskt atvinnulíf. Meðalið má ekki vera hættulegra en sjúkdómurinn.“
