Alþingi: Sigmundur Davíð gerði grein fyrir atkvæði sínu þegar samþykkt var að efna til þjóðaratkvæðis 29. ágúst n.k.:
Þetta er ótækt, frú forseti.
„Það var farið af stað með þetta mál á fölskum forsendum eins og komið hefur á daginn. Spurningin reyndist gölluð, villandi, röng; dagsetningin er fráleit og ítrekað hefur frekar verið leitast við að koma í veg fyrir umræðu um málið og dreifingu upplýsinga en að upplýsa þjóðina. Þjóðinni er ekki treyst fyrir innihaldinu. Það hefur hins vegar ýmsu verið haldið fram hér, frú forseti, og öðru blandað inn í. Fulltrúar Feneyjanefndarinnar útskýrðu fyrir utanríkismálanefnd að það væri í raun ótækt að setja þessi áform um þjóðaratkvæðagreiðslu í samhengi við hugsanlega þjóðaratkvæðagreiðslu síðar. Það væri ekki verið að taka ákvörðun um það, það væri ekki hægt að lofa þeirri þjóðaratkvæðagreiðslu í þessari. Aðalatriðið væri það, og það sem skipti öllu máli, að fólk gerði sér grein fyrir hvaða afleiðingar valkostur A hefði og hvaða afleiðingar valkostur B hefði. Meiri hlutanum hefur ekki tekist að útskýra það. Það eru tveir valkostir og í hvorugu tilviki er vitað fyrir víst hvert þeir leiða. Þetta er ótækt, frú forseti, óforsvaranlegt fyrir Alþingi að afgreiða mál með þessum hætti. — Ég segi nei.“
