- Advertisement -

„Trump er dóni“ – „útskúfandi og hótandi“

Þröstur Ólafsson og Svavar Gestsson eru báðir undrandi á Donald Trump og hrifnir af viðbrögðum Dana.

„Mikið er gaman af að fylgjast með hve Danir hafa mikið og heilbrigt sjálfstraust. D. Trump gengur um heiminn útskúfandi og hótandi öllum sem ekki bugta sig og beygja fyrir honum,“ skrifar Þröstur Ólafsson hagfræðingur.

Svavar Gestsson er ekki sáttur með framgöngu Bandaríkjaforseta: „Donald Trump er dóni. Hann sníkti boð til Danmerkur. Hann ákvað að hann vildi kaupa stóran hluta þess lands sem Danir líta á sem sitt land. Og hann sagði frá því. Danir mótmæltu og Grænlendingar mótmæltu. Þá tilkynnti hann á twitter að hann færi ekki til Danmerkur. Um leið birtist hann sem grófasta gerð kapítalismans holdi klædd. Hann segir frá því sem hann vill eignast og að hann vilji kaupa það.“

„Það er með ólíkindum að jafn vel menntuð þjóð og Bandaríkjamenn eru skuli kjósa annan eins trúð sem forseta. Danir vita að samfélag þeirra skarar fram úr í heiminum, Þeir eru frjálslyndir og ganga með opnum bjartsýnum huga til samstarfs með öðrum stærri þjóðum án nagandi minnimáttarkenndar um að stærri þjóðir sitji á svikráðum við þá, eins og stór hluti Íslendinga temur sér. Þeir afgreiða Trump svo „fullstændig ligeglad“ eins og hann sé ómerkilegt kusk sem dusta þurfi af sér. Bravó Danir,“ skrifar Þröstur.

Þú gætir haft áhuga á þessum

„Bandaríkjastjórn leit lengi vel á öll lönd heims sem sína fasteign. Hún borgaði þegar þurfti annað hvort í vörum eða verksmiðjum eða Marshallfé. Dóninn Trump kemur til dyranna eins og kapítalisminn er klæddur. Hann er hreinskilinn,“ skrifar Svavar.


Booking.com

Tengdar fréttir sem þú gætir haft áhuga á að lesa: