„Það verður að gera þá kröfu að fram komi tafarlaust að útboðsreglur, sem voru notaðar við gerð og framkvæmd útboðsins um verslunarrekstur í Flugstöð Leifs Eiríkssonar, hafi verið í samræmi við þær útboðsreglur sem ríkið starfar eftir. Það er mjög brýnt herra forseti, að þessar upplýsingar komi fram hið fyrsta vegna þess að svo virðist sem fyrri stjórn Fríhafnarinnar hafi tekið ákvarðanir um þetta efni og það verður þá að liggja alveg kristalklárt fyrir að þær séu í samræmi við þær reglur sem ríkið starfar eftir,“ sagði Þorsteinn Sæmundsson, alþingismaður Framsóknarflokksins, á Alþingi í gær þegar hann talaði um nýleg tilboð Isavia um verslunarrekstur í Flugstöð Leifs Eiríkssonar.
Þingmaðurinn sagði að útboðið hafi farið fram á ensku og í samráði við erlenda ráðgjafa og hann sagðist ekki vita til þess að Ríkiskaup hafi komið að framkvæmd þess og/eða undirbúningi. „Það hefur komið fram að nokkrum vel þekktum og vel metnum fyrirtækjum með flekklausan feril hefur verið hafnað á huglægum forsendum og jafnframt án þess að viðkomandi hafi fengið tækifæri til að kynna tilboð sín fyrir valnefnd sem var skipuð vegna útboðsins. Það vekur sérstaka athygli að Fríhöfnin, sem er ríkisfyrirtæki, fékk ekki náð fyrir augum ríkisfyrirtækisins Isavia um verslunarrekstur í Flugstöð Leifs Eiríkssonar. Sú ráðstöfun virðist ekki hafa gengið hávaðalaust fyrir sig vegna þess að tveir lykilstarfsmenn Fríhafnarinnar hafa látið af störfum nýlega og mjög snögglega.“
