„Sjávarútvegurinn, það þarf ekki að nefna það, virðulegur forseti, hver staðan er þar. Ytri aðstæður eru bara mjög erfiðar.“
Jón Gunnarsson.
Sjávarútvegur: Mikil átök voru á Alþingi þegar samþykkt var að hækka veiðigjöldin. Nánast voru bloðug átök. Rifjum upp hluta þess sem sagt var og um leið sjáum við stórútgerðirnar hagnast með hreinum ólíkindum. Skoðum þetta betur:
Síðast var það Ísfélagið í Vestmannaeyjum sem lauk við útreikninga um niðurstöðu rekstursins Ísfélagið í Vestmannaeyjum hagnaðist um 2,8 milljarða króna á fyrsta ársfjórðungi 2026. Rekstrartekjur félagsins voru 9.080 milljónir króna, rekstrarhagnaður 3.336 milljónir króna, hagnaður eftir skatta 2.832 milljónir króna og EBITDA-framlegð var 3.925 milljónir króna.
Ísfélagið varð að borga út vænan arð sökum þess hversu hagnaðurinn á fyrstu fjórum mánuðum ársins. Margir þingmenn töldu víst að útgerðin myndi aldrei ráða við veiðigjöldin sem ríkisstjórnin lagði á. Og það eftir dæmafáa hörku á Alþingi.
Til að mynda hafa stóru útgerðarfyrirtækin gert það gott það sem af er ári. Sem betur fer. Víst er að þau hefðu ráðið við að borga hærri veiðigjöld.
Vegna hærri veiðigjalda töluðu nokkrir þingmenn á þá leið að hér myndi allt sigla í strand.
Skoðum það ögn betur, byrjum á Jóni Gunnarssyni:
„Sjávarútvegurinn, það þarf ekki að nefna það, virðulegur forseti, hver staðan er þar. Ytri aðstæður eru bara mjög erfiðar. Það eru minnkandi heimildir í þorski, okkar helstu og verðmætustu tegund. Það er útlit fyrir gríðarlegan samdrátt í makríl og kolmunna og loðnan er háð mikilli óvissu eins og við þekkjum. Það er kominn ákveðinn upphafskvóti, hann er takmarkaður og við vitum ekkert hvað verður. Við þessar aðstæður ákvað ríkisstjórnin að hækka veiðigjöld úr öllu hófi þrátt fyrir viðvaranir hagsmunaaðila, sem var eðlilegt, en líka allra sveitarfélaganna, líka allra stéttarfélaga sem koma að sjávarútvegi. Alls staðar hljómuðu viðvörunarbjöllur. En þetta var bara eðlileg leiðrétting, þetta var ekki skattahækkun. Margir þingmenn stjórnarflokkanna stóðu í ræðupúlti og sögðu það bara blákalt: Þetta er ekki nein skattahækkun, það er alger misskilningur, þótt það hafi reyndar staðið í frumvarpinu sjálfu að þetta væri skattahækkun. Svona er blekkingaleikurinn og frasapólitíkin ráðandi þegar kemur að þessum flokkum,“ sagði Jón Gunnarsson 3. desember síðastliðinn.
Þórarinn Ingi Pétursson sveif líka á dökku skýi: „Hvort það sé eingöngu í kjölfar ákveðinna skattahækkana skal ég ekki segja til um en því miður óttast ég að þau veiðigjöld sem voru samþykkt í vor fari að hafa veruleg áhrif á atvinnu vítt og breitt um landið.“
Bryndís Haraldsdóttir sagði á Alþingi: „Þau spil sem við höfum séð á hingað til hjá hæstv. ríkisstjórn eru skattahækkanir. Veiðigjöldin eru auðvitað besta dæmið um það. En það hefur svo sem verið boðað líka fyrir aðrar atvinnugreinar í formi auðlindaskatta og við höfum svo sem ekki séð nákvæmlega inn í það.“
Stefán Vagn Stefánsson sagði: „Veiðigjöldin eru farin að bíta…“
Þorgrímur Sigmundsson sagði: „Snörp hækkun veiðigjalda er nú þegar farin að hafa áhrif…“
