- Advertisement -

Bæjarstjóri Hafnarfjarðar taki borgarstjórnarmeirihlutann í kennslu

Tekjur aukast en skuldir hækka hjá Reykjavíkurborg.

Þar sem það er föstudagurinn langi er föstudagspistillinn styttri. Bara til að vera smá öfugsnúinn og með mótþróa.

Gunnar Smári er frábær. Hann hefur látið til sín taka í íslensku samfélagi um árabil. Þó að leiðin hafi ekki alltaf verið greiðfær, þá hefur hann klórað sig áfram, enda ljúfur gaur. Það hefur verið í fréttum að starfsmenn hans á Fréttatímanum eiga inni laun og í stað þess að gera upp við starfsmennina vill hann gera vel við alla. Já hann er að stofna sósíalistaflokk Íslands og velur að sjálfsögðu 1.maí til stofnfundar. Já á sama tíma og áhyggjur manns um gott fylgi VG í skoðunarkönnunum kemur öðlingurinn Gunnar Smári til hjálpar. Ef nýji flokkurinn hans fær eitthvað fylgi þá er það frá hörðustu VG félögum sem ekki hafa fundið sér farveg nógu langt til vinstri en VG. Þessi yfirvofandi klofningur á vinstri vængnum tryggir stöðu frjálsræðis og frelsis í samfélaginu, því ber að fagna.

Talandi um sósíalista, þá varaði vinkona mín, Oddný Harðardóttir þingmaður Samfylkingarinnar við stofnun flokksins. Hún er sammála mér að ekki sé þörf á nýju afli á vinstri vængnum. Ástæða hennar er þó önnur en mín, hún bendir sósíalistum á að þeir eru velkomnir í Samfylkinguna. Þetta kemur á óvart þar sem stigsmunur er á jafnaðarstefnu og þeirri sósíalísku. En  þarna er Oddný kannski að viðurkenna það sem þjóðin hefur vitað lengi, Samfylkingin er mun lengra til vinstri en viðurkennt er og því að fjarlægast stefnu sína.

Íslandsbanki hefur hrist upp í umræðunni um húsnæðismál ungs fólks með nýrri auglýsingaherferð.  Sitt sýnis hverjum, herferðin þykir umdeild. Íslandsbanki bendir einfaldlega á þá staðreynd að ef hugurinn liggur til íbúðakaupa þarf að hafa plan. Skipuleggja fjármögnunina og leggja fyrir. Af hverju má bankinn ekki benda á þá augljósu staðreynd? Eru virkilega einhverjir með hugann við 100% lántöku sem lék marga grátt í hruninu? Auðvitað er margt athugavert við greiðslumat bankanna, en það sem seldi mér herferð bankans var þegar markaðsstjóri hans spurði hreint út í útvarpsþætti á Bylgjunni hvort væri gáfulegra að birta auglýsingar þar sem brosmilt par gengur inn í 60 milljóna fasteign – glansmyndin uppmáluð eða hvort við viljum taka á staðreyndinni í húsnæðiskaupum ungs fólks?

Gat ekki annað en flissað yfir fyrirsögnum fjölmiðla þess efnis að þyngstu dómar í fjársvikamálum hafi fallið – svo fer maður að lesa og um er að ræða hóp fólks sem stálu 300 milljónum frá íslenskum skattgreiðendum og komust upp með það. Jú dómarnir eru meira og minna skilorð og jú, peningarnir finnast ekki. Eflaust margir til í að vera á skilorði, stoppa á rauðu ljósi, sleppa því að hnupla í Hagkaup, en njóta fjárhæðinnar. Þessir dómar voru grín vikunnar.

Tekjur aukast en skuldir hækka hjá Reykjavíkurborg. Á sama tíma hefur Hafnarfjörður risið upp úr öskunni, skuldafeni og vandræðum og stefnir í að verða skuldlaust bæjarfélag. Hvað gerðist? Jú bæjarfulltrúar réðu hæfan bæjarstjóra sem fór í það verkefni með bæjarfulltrúum að taka verulega til í rekstri bæjarins. Árangurinn er ótvíræður. Á sama tíma hækka útgjaldaliðir borgarinnar, starfsmönnum fjölgar að meðaltali um 109 á hverju ári án þess að hægt sé að fá skýringu á því hvað allt þetta fólk starfar við hjá borginni. Spurning að bæjarstjóri Hafnarfjarðar taki borgarstjórnarmeirihlutann í kennslu varðandi rekstur bæjarfélaga. Það er nokkuð ljóst að ef Reykjavík væri hlutafélag væru hluthafarnir búnir að reka stjórnendur.

Vinur minn er í úbúðarleit og fór á opið hús til að skoða eina. Íbúðin er í útleigu og að sjálfsögðu vill leigjandinn ekki að íbúðin seljist. Óhreinn þvottur og þar með talið nærföt út um öll gólf, ekki hafði verið vaskað upp svo dögum skiptir og miðað við lætin í þremur börnum fengu þau dágóðan skammt af sykri til að vera nógu æst og upp um alla veggi. Fólk sem kom að skoða hrökklaðist út og miðað við sóðaskapinn fóru án ef margir heim í sturtu og hentu fötunum í þvottavélina. Þarna hefur þessi fjölskylda án efa tryggt sér auka mánuði í húsnæðinu þetta má kalla sjálfsbjargarviðleitni í húsnæðisskortinum. Spurning ef að til þess komi að selja íbúðina sem ég leigi hvort það sé einhver sem getur lánað mér fersk og fjörug börn þegar einhver kemur að skoða.

Gleðilega páska


Booking.com

Tengdar fréttir sem þú gætir haft áhuga á að lesa: