Fréttatilkynning frá Skiltaköllunum, hrekkjalómafélagi. 18/8/2020.
Skiltakallarnir lýsa yfir alveg rosalegum stuðningi við hann Þorstein Má Baldvinsson eða hann Mása okkar.
Frá því Mási fór í útgerð hafa fiskarnir í sjónum beinlínis stokkið upp í bátana hans og peningarnir rúllað í vasana. Engum hefur tekist eins vel að hreinsa upp öll verðmæti sjávarútvegsauðlindarinnar og Mása með samherjunum sínum.
Það er með eindæmum hvað þetta hefur gengið vel og þess vegna er líka rosalega leiðinlegt að þurfa að hlusta á allt öfundartalið og að hann sé kallaður ,,Skíthæll.“
Þeir fiska sem róa – ekki hinir. Þjóðin getur ekki átt neitt sagði Heiðrún Lind Marteinsdóttir hjá SFS (nóv. 2016) og það er sko algerlega þannig hjá Mása því það er hann sem á það sem hann fiskar – ekki hinir og það er bara óþolandi að þurfa alltaf að hlusta á þetta öfundarvæl í kommunum alla tíð.
Þegar hann hóf útgerð í Namibíu gekk það rosalega vel, Íslendingar voru búnir að hjálpa helling til þarna svo Mási gat heldur betur fengið aðgang að fiskinum þar líka, enda Íslendingur. Mási mokaði svo upp fiskinum og peningurinn streymdi í tonnatali í löglegu aflandsreikningana hans sem aldrei fyrr. Það þýðir ekkert fyrir einhverja öfundsjúka Namibíska sósíalista að væla yfir því að hafi ekki fengið vinnu við fiskvinnsluna því þeir kunna ekkert á fisk, þess vegna var þessu bjargað í vinnsluskipin og svo fengu bara þeir aðilar í Namibíu pening sem áttu það sannarlega skilið fyrir alla ráðgjöfina.
Það hefur líka verið algerlega ómetanlegt fyrir Mása og samherjana hans að hafa stuðning ráðherrans Kristjáns Þorir Júlíussonar, besta vinar síns. Þetta verður sko að virða og það verður að segjast sem er að þetta hefði aldrei getað gengið eins vel hjá honum Mása sem er svo sannarlega ástmögur þjóðarinnar, – ef Kristján Þorir hefði ekki stutt hann í blíðu og stríðu með allan Sjálfstæðisflokkinn að baki.
Skiltakallarnir lýsa því yfir alveg rosalegum stuðningi við Mása og samherjana hans og ætla þess vegna að skilta það um borg og by alla þessa viku að minnsta kosti, því hvar væri Ísland án svona manna sem kunna svona snilldarlega á kerfið, fiskinn, auðlindirnar, peninginn, aflandsfélögin, stjórnmálamennina og Alþingið okkar sem gerir alltaf allt sem Mása vantar til að halda uppi byggð og aga í þorpum landsins. Meira að segja tókst þeim að koma í veg fyrir stórskaðlega stjórnarskrá kommahippana á Austurvelli.
Lengi lifi Mási og lengi lifi besti vinur hans Kristján Þór Júlíusson ráðherra og bara allur Sjálfstæðisflokkurinn líka, Ísland gæti ekki verið í betri böndum.
Skiltakallarnir,
Óli, Leifur og Kolla.
Skiltakarlarnir eru á fasbókinni en þar eru alltaf nýjar myndir af stuðningsskiltum fyrir Mása og Kristján Þór, sem eru sett upp í umferðinni daglega.