- Advertisement -

Sleppa því að fara til læknis, eða að borga húsaleiguna?

Björgvin Guðmundsson.

Hvað liggur þyngst á þeim öldruðum og öryrkjum,sem einungis hafa lífeyri almannatrygginga sér til framfærslu eða mjög lélegan lífeyrissjóð til viðbótar. Það sem liggur þyngst á þeim er hvernig þeir kljúfa morgundaginn fjárhagslega. Verða þeir að sleppa því að fara til læknis? Geta þeir greitt húsaleiguna. Verður nóg fyrir mat? Og svo má áfram telja.

Það er einnig mjög sárt að geta ekki gefið barnabörnunum gjafir á afmælum. Allir sjá, að þessi staða er óásættanleg.

„Velferðarríki“ getur ekki boðið þeim verst stöddu meðal aldraðra og öryrkja slík kjör. En það gerir Ísland á sama tíma og yfirstéttin veltir sér úr ofurlaunum og þar á meðal eru þingmenn og ráherrar, sem ekki vilja lagfæra lægstu laun þessara aðila.

Þú gætir haft áhuga á þessum

Ísland er á toppi uppsveiflu í efnahagslífinu; örlítil lækkun hefur orðið en ennþá flóir allt í peningum. En jafnvel í þessu ástandi telja þingmenn og ráðherrar ekki unnt að lagfæra ástandið með hækkun lægsta lífeyris. Hvenær er þá unnt að gera það. Ráðherrunum (forsætisráðherra) dettur alltaf einhver leið í hug til þess að fresta (koma sér hjá) að leysa vanda þeirra lægst launuðu. Nú er leiðin sú að vísa málum í starfshóp.

Það liggur við að ríkisstjórnin skipi einn starfshóp á dag. Jafnvel þó öll gögn liggi fyrir og ekki þurfi að athuga neitt er skipaður starfshópur um málið, aðeins til þess að þurfa ekki að gera neitt strax, heldur að fresta málinu. Og þannig stendur ríkisstjórnin að verki gagnvart þeim, sem lægstan lífeyri hafa og geta ekki framfleytt sér af þeirri hungurlús,sem ríkisstjórnin og alþingi skammtar þeim.

Giftir aldraðir og öryrkjar hafa 204 þúsund á mánuði eftir skatt. Það er rétt rúmlega fyrir húsaleigu! Og þá er eftir að greiða alla aðra kostnaðarliði. Einhleypir hafa 243 þúsund kr á mánuði eftir skatt. Ráðherrarnur hafa 1,8 milljón á mánuði fyrir skatt, frían bíl og að mestu fríar utanferðir og alls konar hlunnindi til viðbótar.

Þingmenn hafa 1,1 milljón kr í föst laun fyrir skatt á mánuði en við bætist ótölulegur fjöldi aukagreiðslna eins og vel kemur fram á þeim upplýsingum,sem ég hef birt. En þrátt fyrir allar þessar greiðslur, sem þingmenn fá eru þeir alltaf í fríi. Nú eru þeir í fríi og mæta ekki fyrr en í byrjun september. Þeir voru lengi í fríi vegna sveitarstjórnarkosninga og eftir jól mæta þeir ekki á þingi fyrr en 22. eða 23.janúar. Það er því ljóst að þeir vinna ekki fyrir kaupinu sínu.

Álit þjóðarinnar á alþingi er lítið. Það batnar ekki við að þingmenn sitja með hendur í skauti þó þeir verst stöddu meðal aldraðra og öryrkja eigi varla fyrir mat og eigi hvergi nærri fyrir öllum útgjöldum. Ef þingmenn tækju höndum saman þvert á flokka og leystu vanda þessa hóps mundi álit þjóðarinnar á alþingi aukast mikið. Í raun liggur valdið hjá þingmönnunum en ekki hjá ráðherrunum. En þingmenn vantar kjark til þess að nota vald sitt.

Björgvin Guðmundsson.

 

 


Booking.com

Auglýsing

Tengdar fréttir sem þú gætir haft áhuga á að lesa: