Ef marka má stjórnarandstöðuna þá er íslenska krónan lykilatriði og í rauninni forsenda fyrir velgengni hér á landi
Ef við losnum við gjaldeyrisáhættuna mun okkur að mörgu leyti vegna betur en með örmynt. Það er ekki hægt að þræta fyrir það.
Dagbjört Hákonardóttir.
Alþingi: Dagbjört Hákonardóttir Samfylkingu sagði á Alþingi, undir liðnum Störf þingsins, og sagði:
„Ef marka má stjórnarandstöðuna þá er íslenska krónan lykilatriði og í rauninni forsenda fyrir velgengni hér á landi. Lykilatriðið er að Ísland eigi áfram sína örmynt sem hægt er að fella og stilla eftir þörfum þegar eitthvað bjátar á vegna þess að það náttúrlega gerist aldrei neitt á evrusvæðinu sem þarfnast efnahagslegrar íhlutunar. Svo fáum við náttúrlega allt það besta úr EES-samningnum sem Evrópa hefur upp á að bjóða.
„Þá dreg ég fram svona sérstakt uppáhald mitt í þessari umræðu sem er blessuð Draghi-skýrslan, eins og Mario Draghi hafi ekki verið að tala nákvæmlega um þær áskoranir sem eiga við hér á landi í skýrslu sinni, nema við erum verr stödd sem áhrifalaust EES-land og það er auðvitað verkefni þessarar ríkisstjórnar að vinda ofan af gullhúðun og flóknu regluverki sem fyrri ríkisstjórnir hafa boðið okkur upp á. En ég er sjálf mjög þakklát fyrir það að vera hluti af eina stóra fríverslunarsvæðinu sem eftir er í heiminum, með fullri virðingu fyrir Kína og Bandaríkjunum sem virða lýðræðisreglur að vettugi, svona fyrst við erum að ræða um tæknilegar framfarir og gervigreind, aðeins að hafa það hugfast,“ sagði Dagbjört.
Og endaði svo ræðu sína á þennan hátt:
„En staðan er þessi: Ef við losnum við gjaldeyrisáhættuna mun okkur að mörgu leyti vegna betur en með örmynt. Það er ekki hægt að þræta fyrir það. Svo er það bara spurning hvort við séum ósammála um hvort það sé þess virði. Það er þetta sem við ætlum að reyna að láta kanna. Okkur gengur vel vegna þess að Íslendingar eru duglegir. Við erum hörkudugleg og við kunnum að vinna. Hér er öflugt atvinnulíf og sterk verkalýðsbarátta, hér er jafnrétti kynjanna, við höfum nýtt auðlindir okkar skynsamlega og það er félagslegur hreyfanleiki. Þetta höfum við gert þrátt fyrir krónuna, ekki vegna hennar. Og nei, það er ekki þess virði að reka hér gjaldmiðil til lengdar sem kostar rúmlega 900 milljarða kr. að halda uppi gjaldeyrisvaraforða. Svo getum við rætt það hvernig breiðu bökin í samfélaginu sækja sér fjármögnun með því að taka lán í evrum sem býðst ekki heimilunum í landinu. En nei, um það talar stjórnarandstaðan svo sannarlega ekki.“
