- Advertisement -

Þekkingarleysi Dags á ástandinu á Laugavegi

Er þarna kannski fundin skýringin á að þú forðast Laugaveginn eins og heitan eldinn?

Bolli Kristinsson, kaupmaður og Reykvíkingur, skrifar:

Mikið var nú hjákátleg og ómálefnaleg athugasemd þín við auglýsingu mína í Morgunblaðinu 17. september sl. Vissulega er rétt að ég bý hluta úr ári á Spáni. Ég bý líka hluta úr ári í Reykjavík og á Laugavegi af öllum stöðum og hef búið við Laugaveg í rúmlega 30 ár. Þá mánuði sem ég bý við Laugaveg geng ég um götuna og miðborgina nokkrum sinnum á dag. Það er meira en þú gerir. Mér skilst að sést hafi tvisvar sinnum til þín að degi til á árinu. Þekkingarleysi þitt á sér engin takmörk. Þú segir að verslunarmiðstöðvar eigi undir högg að sækja á sama tíma sem þær blómstra sem aldrei fyrr og þar getur þú séð blómlegt mannlíf Íslendinga, ekki á Laugavegi. 

Ég get ekki skilið hvernig þú færð það út að Laugavegurinn blómstri og sé eftirsóttur þegar hátt í 40 verslunar- og veitingahús standa auð og fjölgar stöðugt. Er þarna kannski fundin skýringin á að þú forðast Laugaveginn eins og heitan eldinn?

Það er ekki bara að þú afhjúpir þekkingarleysi þitt á Laugaveginum heldur er sama sagan varðandi Hverfisgötu sem þú segir að hafi gengið í endurnýjun lífdaga. Þar er stór hluti verslunarrýma einnig auður og mörg verið auð frá því þau voru byggð. Svo vil ég minna á að Grandinn hefur ekkert með Laugaveg að gera.

Ég vona að þú þiggir boð mitt og kaupmanna í Miðbæjarfélaginu.

Ég hef haft samband við nokkra rekstraraðila sem eru tilbúnir að ganga Laugaveginn með þér svo þú getir séð raunveruleikann með eigin augum. 

Þú þarft ekkert að óttast. Þetta er allt grandvart sómafólk sem hefur margt hvert helgað sig rekstri á Laugavegi alla sína starfstíð og ber hag götunnar og miðbæjarins fyrir brjósti enda lífsstarf þeirra undir. 

Þá er kjörið tækifæri fyrir okkur að ræða Akureyrarleiðina varðandi lokanir gatna. Þar er allt í sátt og samlyndi og fullt samráð og tillit tekið til rekstraraðila og þeirra óska. 

Ég geri mér þó grein fyrir að þið skiljið ekki orðið samráð.

Þú getur þá í leiðinni skoðað allt veggjakrotið sem er það eina sem er í sókn á Laugaveginum enda gata með ekkert samfellt gegnumflæði bíla kjörin aðstaða fyrir skemmdarverk, tala nú ekki um innbrot á dimmum nóttum. Þar er til dæmis ekki leigubíll á ferðinni. 

Þekkingarleysi þitt á ástandinu á Laugavegi ásamt öðru klúðri sannar orð mín að þú ert versti borgarstjóri í sögu Reykjavíkur. 

Ég vona að þú þiggir boð mitt og kaupmanna í Miðbæjarfélaginu. Hver veit nema að þú sjáir ljósið.


Auglýsing

Tengdar fréttir sem þú gætir haft áhuga á að lesa: