Sigurjón Þórðarson, formaður atvinnuveganefndar Alþingis skrifar:
Upphlaup stjórnarandstöðunnar Alþingi eru yfirgengilega rugluð á köflum. Í gær fór ég í viðtal á Útvarpi Sögu um fréttir vikunnar ásamt Jóni Gunnarssyni og var ég vart snúinn til baka úr viðtalinu og niður á Austurvöll á ný, þegar ég varð þess var, að viðtalið olli gríðarlegu uppnámi.
Fyrirfram þá bjóst ég við að það væru orð þingmanns Sjálfstæðisflokksins í fyrrgreindum þætti sem gaf það í skyn að mögulega væri eitthvað hæft í landráðakæru á hendur ráðherra í ríkisstjórn Íslands. Nei nei umræðan snérist um orð sem ég lét falla í auglýsingahléi við fyrrgreindan þingmann Jón Gunnarsson, um að mögulega yrði þinghaldi ekki lokið fyrr en í ágúst.
Af þessu tilefni hljóp slatti af þingmönnum stjórnarandstöðunnar upp í ræðupúlt þingsins sama dag undir liðnum fundarstjórn forseta og gerðu alvarlega athugasemd við ummæli í viðtali sem þeir höfðu örugglega aldrei heyrt enda var ummælunum aldrei útvarpað. Ýmsir reyndu að gera sig breiða á minn kostnað með hálfgerðum uppnefnum og líkja mér reyndar einnig við þann ágæta mann Donald J. Trump.
Það var einsog við manninn mælt Morgunblaðið tók þetta endemis rugl upp í Staksteinum, þar sem miðillinn vitnaði í „viðtalið“ á Útvarpi Sögu til vitnis um taugatitring ríkisstjórnarinnar.
Þessi þvæla öll frá upphafi til enda er vart til þess að auka traust og trúverðugleika stjórnarandstöðunnar, en hér er viðtalið.