„Telur ráðherra að áfengisfrumvarpið samræmist heilbrigðisstefnu ríkisstjórnarinnar og styður ráðherra frumvarpið?“
Þannig hljóðar fysta fyrirspurn, Elsu Láru Arnardóttir Framsóknarflokki, af þremur sem verða ræddar á Alþingi í dag. Þá mun væntanlega skýrast hver afstaða Óttars Proppé heilbrigðisráðherra er til þessa umdeilda máls.
Elsa Lára spyr einnig Sigríði Á. Andersen dómsmálaráðherra. „Er unnið að lagabreytingum á grunni skýrslu innanríkisráðherra um jafnt búsetuform barna sem búa á tveimur heimilum sem lögð var fram á Alþingi í september 2015?“ Og eins spyr þingmaðurinn: „Ef svo er, hvenær verða frumvörp um málið lögð fram? Ef ekki, hvenær ætlar ráðherra að hefja þá vinnu?“
Og að endingu spyr Elsa Lára Þorstein Víglundsson, félags- og jafnréttismálaráðherra: „Hyggst ráðherra hefja átak í að stytta biðlista eftir greiningu, m.a. hjá Greiningar- og ráðgjafarstöð ríkisins og Þroska- og hegðunarstöð?“ Og svo er það spurning um peningana: „Hyggst ráðherra bæta við fjármagni til að stytta biðlista eða beita sér fyrir annars konar aðgerðum og ef svo er, hvernig aðgerðum?“
Þingfundur hefst klukkan þrjú í dag með óundirbúnum fyrirspurnum og að þeim loknum spyr Birgitta Jónsdóttir dómsmálaráðherra hvernig unnið sé að undirbúningi innleiðingar á valfrjálsri bókun við samning Sameinuðu þjóðanna gegn pyndingum og annarri grimmilegri, ómannlegri eða vanvirðandi meðferð eða refsingu, sem samþykkt var af hálfu Alþingis 19. desember 2015, og hvenær er áætlað að eftirlit samkvæmt henni hefjist?
