…hækkun krónutölugjalda, er í raun og veru aðhaldsaðgerð í sjálfu sér…
Katrín Jakobsdóttir.
Óðinn Viðskiptablaðið lætur sem hann hafi farið með foringja ríkisstjórnarinnar í sneiðmyndatöku. Hann skrifar um árangurinn í nýjasta tölublaði Viðskiptablaðsins. Sameiginleg niðurstaða er að hér stjórni vinstri stjórn. Óðinn segir að mbl.is hafi rætt við aðalfólkið í ríkisstjórninni daginn sem Seðlabankinn kynnti um nýjustu vaxtahækkunina.
Byrjum á Katrínu Jakobsdóttur.
„Katrín Jakobsdóttir forsætisráðherra og formaður vinstri grænna sagði:
Þetta var mjög hófstillt hækkun…
Ég vil segja það út af þessum rökstuðningi þar sem meðal annars er rætt um ríkisútgjöld, þá vil ég minna á að það sem mest hefur verið gagnrýnt í síðustu fjárlögum, hækkun krónutölugjalda, er í raun og veru aðhaldsaðgerð í sjálfu sér og verðbólguáhrif af henni voru algjörlega fyrirséð.
Þetta var mjög hófstillt hækkun, sem kemur í veg fyrir að þessi gjöld rýrni meira að raungildi en orðið er. Þannig að það er ekkert þar sem kemur á óvart.
Ég vil líka segja að þau auknu útgjöld sem ráðist var í voru fyrst og fremst útgjöld sem í raun og veru var ekki hægt að komast hjá, en þá er ég fyrst og fremst að vitna í framlögin til heilbrigðismála.
Katrín kemur þarna eins og álfur út úr hól, eiginlega eins og álfur út úr sjálfshól, og minnir nokkuð á Jóhönnu Sigurðardóttur. Þessar gjaldskrárhækkanir eru aukaatriði í hinu stóra samhengi, en þær og röksemdafærslan fyrir þeim er dæmigerð fyrir hugsunarháttinn á stjórnarheimilinu. Það sem skiptir máli er peningaprentun ríkisstjórnarinnar með takmarkalausri útgjaldaaukningu og hallarekstri, sem mun samkvæmt þeirra eigin — ekki verulega sannfærandi — áætlunum standa yfir í næstum áratug.“
