„Þetta eru þrjár spurningar: Hver er kennslufræðin? Úr hvaða jarðvegi spretta námsgögnin? Og hver er þessi stoð, hæfni fyrir framtíðina? Hvað þýðir það?“
Jón Pétur Zimsen Sjálfstæðisflokki.
Jón Pétur Zimsen Sjálfstæðisflokki spurði Guðmund Inga Kristinsson þriggja spurninga:
„Það er örugglega ýmislegt til bóta í þessu frumvarpi. En það sem mig langar að spyrja hæstvirtan ráðherra um í þessari fyrri atrennu varðar greinargerðina; tilefni og nauðsyn þess að breyta þessum lögum. Það er fyrsta spurning sem ég væri ánægður með að fá svör við frá hæstvirtan mennta- og barnamálaráðherra. Það er talað um að menntastefnan byggist á fimm stoðum og ein þeirra er hæfni fyrir framtíðina. Ég væri til í að fá að vita hver þessi hæfni er. Hver er hæfnin fyrir framtíðina, ein af fimm eftirfarandi stoðum? Svo myndi ég vilja fá að vita líka, spurning tvö: Á hverju byggja námsgögnin? Hvaðan eru námsgögnin sem gerð verða? Úr hvaða jarðvegi eru þau sprottin? Og spurning þrjú: Það kemur fram að námsgögnin eigi að vera vönduð og fjölbreytt og að þau eigi að byggjast á traustri kennslufræði. Kennslufræði, eins og við vitum, getur verið alls konar. Hingað til hefur okkur ekki gengið vel að fylgja eftir lestri barna þannig að ég spyr líka: Hver er kennslufræðin sem þessi námsgögn eiga að byggja á? Þetta eru þrjár spurningar: Hver er kennslufræðin? Úr hvaða jarðvegi spretta námsgögnin? Og hver er þessi stoð, hæfni fyrir framtíðina? Hvað þýðir það?“
Guðmundur Ingi Kristinsson barna- og menntamálaráðherra svaraði:
„Hver er þessi stoð? Hver er framtíðin? Ef ég sæi fram í tímann þá gæti ég svarað þessu alveg bara 100%, en framtíðin er óviss, eins og við vitum alltaf. En nútíðin er það ekki.
Við vitum nákvæmlega hvað ætlum að gera í dag en stoðin fyrir framtíðina — við verðum líka að vera opin fyrir því hvað er í framtíðinni. Ég var t.d. að fá inn á borð mitt núna möguleika á því að nýta gervigreind í sambandi við skóla, grunnskóla og annað. Þetta kemur frá Eistlandi. Þeir eru byrjaðir að taka þar inn ákveðna þætti og eru að bjóða okkur að vera með á spennandi braut um það hvernig við ætlum að taka á framtíðinni, hvort við ætlum að nýta líka gervigreindina í framtíðinni inn í skólakerfið. Það er t.d. ein af þessum stoðum sem við getum verið með þarna.
Ef ég skildi rétt um þróun námsgagna, hvernig við ætlum að taka á — ég tel að við séum að opna hérna ákveðna gátt um það og möguleika á því að bæði þýða námsgögn og það verður spennandi fyrir einhverja að framleiða námsgögn. Við erum að reyna að búa til þannig umhverfi að við séum tilbúin á hverjum tíma að taka inn þau námsgögn sem henta best. Ég vona að það verði samtal á milli allra, kennara og fræðimanna og annarra sem að þessu koma, um það að finna bestu leiðirnar, vegna þess að til hvers erum við að þessu? Jú, við erum að gera þetta til þess að mennta börnin okkar og þá hljótum við að standa saman um það að finna bestu leiðina til að gera það og ég tel okkur að vera að opna hérna þá leið til að gera það,“ sagði Guðmundur Ingi Kristinsson.
