Ragnar Önundarson skrifaði:
Benti Tómas á að íslenska hagkerfið hefði síðan tekið hraðan viðsnúning, meðal annars með miklum hagvexti árið 2022.
Efnahagsmál: Tómas Brynjólfsson, varaseðlabankastjóri sagði að til að taka upp evru, þyrfti Ísland fyrst að uppfylla ströng skilyrði um verðbólgu, vexti og efnahagslegan stöðugleika. Hann sagði að það þýddi, að sama verkefni og nú væri unnið að innanlands, þyrfti að nást áður en breyting á gjaldmiðli kæmi til greina. Hann lagði áherslu á að því væri ekki hægt að líta á evru sem leið til að komast hjá vandanum, heldur þyrfti að leysa hann innan núverandi kerfis.
Áhrif vaxta á fyrirtæki og efnahagslíf
Í umræðunni kom fram að hækkun vaxta hefði veruleg áhrif á fyrirtæki, þar sem 1% hækkun gæti aukið vaxtakostnað um 70 til 80 milljarða króna. Tómas sagði að fyrirtæki bregðist við slíkum kostnaðarhækkunum með því að draga úr fjárfestingu, minnka umsvif eða kostnað og fækka starfsmönnum. Tómas hafnaði því að þessi áhrif leiddu sjálfkrafa til hækkunar á vöruverði og sagði að slíkt væri ekki í samræmi við þá hagfræðilegu virkni sem peningastefnan byggir á.
Ríkisfjármál og ytri áföll hafa mótað stöðuna
Tómas fjallaði einnig um áhrif ríkisfjármála og benti á að útgjöld hefðu aukist verulega í heimsfaraldrinum þegar stjórnvöld gripu inn í til að milda efnahagslegt högg. Hann sagði að slíkar aðgerðir hefðu verið sambærilegar við það sem gert var í öðrum löndum. Benti Tómas á að íslenska hagkerfið hefði síðan tekið hraðan viðsnúning, meðal annars með miklum hagvexti árið 2022, og að samspil þess við aukna fólksfjölgun og aðra þætti hefði aukið verðbólguþrýsting.
Mikilvægt að draga úr halla
Í umræðunni kom fram að mikilvægt væri að draga úr halla og skuldum ríkissjóðs til lengri tíma. Tómas sagði að lítið og opið hagkerfi þyrfti svigrúm til að bregðast við áföllum, hvort sem þau væru náttúruhamfarir eða efnahagslegar sveiflur. Hann lagði áherslu á að stöðugleiki í ríkisfjármálum, peningamálum og launaþróun þyrfti að haldast í hendur til að ná varanlegum árangri.
