Er þetta óþægilegt? Já. Treystum við okkur í verkefnið? Heldur betur. Já, við vorum vöruð við því að þetta yrði erfitt.
Kristrún Frostadóttir forsætisráðherra.
Alþingi: Sigmundur Davíð spurði forsætisráðherra um stöðu efnahagsmála:
„Viðbrögð hæstvirts forsætisráðherra og hæstvirts fjármálaráðherra við verðbólgutölum hafa verið allsérstök og mikil áhersla lögð á að kenna öllum öðrum um en ríkisstjórninni, og einkum þó fyrirtækjum sem eru skömmuð fyrir að taka þátt í verkefninu. Í hvaða verkefni? Í hvaða plani? Var kannski bara aldrei til neitt plan? Hvernig getur ríkisstjórn farið fram með þeim hætti sem hún gerir og þegar aðrir fylgja í kjölfarið, gera sams konar hluti, hækka verð eins og ríkisstjórnin hækkar sín verð, sín gjöld og skatta, þá eru menn sakaðir um að vera ekki að spila með? Við þessu var varað fyrir áramót og í umræðu um fjárlögin; ef ríkisstjórnin færi í þetta eins og hún ætlaði sér þá yrðu þetta afleiðingarnar. Hún væri að leggja línurnar með fyrirtækin og enn eigum við eftir að sjá hverjar afleiðingarnar verða til fulls.
En spurningin er þessi: Hyggst hæstvirtur forsætisráðherra ekki bregðast við og endurskoða planið, hafi yfirhöfuð einhvern tímann verið til plan? Eða ætlar hæstvirtur ráðherra að láta sér nægja það sem Seðlabankinn benti á samhliða vaxtaákvörðun? Já, og samhliða enn einum útskýringunum á því hvers vegna það voru í rauninni aðgerðir ríkisstjórnarinnar sem orsökuðu verðbólguna, eins og áður hafði komið fram hjá Hagstofunni og greiningaraðila. En Seðlabankinn ákvað þó að hækka ekki vexti að sinni. Hvers vegna? Vegna þess að það væri yfirvofandi samdráttur. Er það planið? Á að fara með sleggju á hagkerfið og verðmætasköpunina í landinu og ná þannig niður verðbólgu? Ná niður verðbólgu með kreppu?“
Kristrún forsætisráðherra svaraði Sigmundi Davíð:
Við gerum þetta samt.
„Ég vitna í yfirlýsingu peningastefnunefndar þar sem fram kemur að þrátt fyrir tímabundna aukningu í verðbólgu hafa verðbólguhorfur lítið breyst. Þetta er lykilatriði. Þessi ríkisstjórn stjórnar ekki landinu út frá stöku mælingum heldur út frá langtímaplani og okkur verður ekki snúið af þeirri braut. Ef við fylgdum þeim tilmælum sem berast úr þessum sal myndum við sjá versnandi afkomu, versnandi verðbólgu og til lengri tíma hærra vaxtastig. Er þetta óþægilegt? Já. Treystum við okkur í verkefnið? Heldur betur. Já, við vorum vöruð við því að þetta yrði erfitt. Við vorum vöruð við því í þessum sal að þetta yrði erfitt en við ætlum samt að gera þetta. Við ætlum að halda kúrs. Við erum núna einmitt að fara í aðra fjármálaáætlun þessarar ríkisstjórnar þar sem við munum halda kúrs. Þetta er það sem þjóðin þarf að heyra. Þetta er það sem almenningur og fyrirtækin í landinu þurfa að heyra. Þau þurfa fyrirsjáanleika og stefnufestu. Við getum ekki verið að hlaupa upp til handa og fóta út af stöku mælingum. Er þetta óþægilegt? Þetta er óþægilegt, háttvirtur þingmaður, en við gerum þetta samt. Það liggur alveg fyrir að planið stendur. Það hefur verið kallað eftir öðrum aðgerðum. Það mun aðeins skila okkur verri stöðu og við gefumst ekki upp hvað þetta varðar. Við höfum lagt fram skilmerkilegar hagræðingaraðgerðir. Við höfum lagt fram aðgerðir sem fyrri ríkisstjórnir hafa ætlað sér að skila af sér í lengri tíma en ekki treyst sér til að gera. Við ætlum að halda kúrs, það er það sem er lykilatriði.
Við höfum líka séð uppfærðar hagvaxtarhorfur í nýjustu Peningamálum hjá Seðlabankanum. Það er verið að færa hagvöxt úr 1,6% í 2%. Ég veit ekki betur, hæstvirtur forseti, en að það séu jákvæðar fréttir að við séum í hóflegum hagvexti. Þessi ríkisstjórn hefur boðað atvinnustefnu, skynsamlega atvinnustefnu, með hóflegum hagvexti sem er einmitt ekki verðbólguhvetjandi. Það hlýtur að vera ánægjuefni til langs tíma.“
