„Hvaða skatta ætlar þessi ríkisstjórn að hækka til að ná hallalausum fjárlögum?“
Þannig spurði Karl Gauti Hjaltason.
Alþingi: Karl Gauti Hjaltason, sem á sæti í fjárlaganefnd, beindi spurningum til Sigurjóns Þórðarsonar, formanns nefndarinnar.
Karl Gauti spurði?
„Háttvirtur framsögumaður svaraði nú ekki þessari spurningu um hvaða skatta hann ætlaði að hækka. En það er augljóst ef þessi ríkisstjórn ætlar að ná hallalausum fjárlögum á næsta ári, eins og hún margítrekar hér í hverri einustu ræðu, að það gengur ekki upp miðað við þær forsendur sem liggja fyrir og meiri hlutinn í fjárlaganefnd vill ekki horfast í augu við. Þess vegna spyr ég bara, og það er eðlileg spurning: Hvaða skatta ætla þau að hækka til að ná hallalausum fjárlögum á næsta ári? Því það er eina ráðið sem þau hafa. Annað er ekki í boði.
Fyrst að háttvirtur þingmaður er nú þekktur sjómaður…
Fyrst að háttvirtur þingmaður er nú þekktur sjómaður þá er þetta svipað því að fara á sjóinn með hálfan tank af olíu, fara út á mið vitandi það fyrir fram að þau komast ekki í land á þeirri olíu sem þau eru með. Þetta er besta lýsingin á þessari áætlun. Þau vita að forsendur eru brostnar. Þau vita að fjárlög næsta árs munu ekki verða hallalaus að óbreyttu og þess vegna er eðlilegt að spyrja: Hvaða skatta ætlar þessi ríkisstjórn að hækka til að ná hallalausum fjárlögum? Hvernig ætlar háttvirtur þingmaður að komast til lands þegar hann er olíulaus úti á miðunum?“
Svo mörg voru þau orð. Sigurjón svaraði:
„Hvernig ætlar maður að komast til lands? Ég vil vekja athygli á því að staða íslenska ríkisins er ekkert afspyrnuslæm samanborið við önnur lönd þannig að það að bera þetta upp að við séum bara á heljarnöf og allt sé að farast eins og stjórnarandstaðan lætur í veðri vaka — það er hér áætlun sem byggist á því að fara áfram í vöxt, hagvöxt, og síðan hægar í útgjöldum en fyrri ríkisstjórn var vís með að fara í.
Ef það er farið yfir söguna þá ætlum við að fara að hægja á útgjöldunum miðað við fyrri ríkisstjórn. Síðan á að fara í frekari hagræðingar. Þetta er sú leið sem við boðum í fjármálaáætluninni og það er sú leið sem við ætlum okkur að fara. En það er rétt að það verður fjárlagafrumvarp lagt fram í haust sem mun taka mið af nýrri þjóðhagsspá og þá verður bara að koma í ljós hvernig brugðist verður við.“
