Alþingi: „Það vantar ekki stuðning í þennan þingsal við þetta frumvarp, jafnvel frá þeim sem eru með sérstakt nefndarálit sem leggst gegn frumvarpinu; þeir lýsa samt yfir stuðningi við frumvarpið. Þetta er þannig mál, málefni fatlaðra, að það vilja auðvitað allir allt fyrir alla gera. Það er skiljanlegt en menn þurfa í stjórnmálum, og löggjafinn sérstaklega, að vera raunsæir og skapa ekki væntingar umfram tilefni,“ sagði Sigríður Á. Andersen þingflokksformaður Miðflokksins, og hélt áfram:
„Það er það sem ég hef kannski áhyggjur af að verið sé að gera með þessu frumvarpi. Þess vegna myndi ég vilja fá að vita afstöðu háttvirts framsögumanns nefndarálits á réttaráhrifum þess að lögfesta þennan samning. Telur háttvirtur þingmaður að lögfestingin kalli á auknar aðgerðir, svo sem þróun einhverra þjónustuúrræða eða einhvers konar ný efnisréttindi til handa fötluðum?“
Kolbrún Áslaugar Baldursdóttir, formaður velferðarnefndar, svaraði:
„Ég þakka háttvirtum þingmanni Sigríði Á. Andersen fyrir hennar andsvar. Það gæti vel gerst. Ég er hvorki miðill né spákona en ég treysti því að ef það koma í ljós nýjar þjónustukröfur eða -þarfir eða hvaðeina — það gæti vel verið, það er bara eins og með aðra hópa í samfélaginu — þá munum við bregðast við því í stað þess að stinga höfðinu í sandinn, að við munum taka á því. En það er ekkert gott að fullyrða um það. Enginn getur staðið hér og sagt: Nei, það mun ekki verða nein þróun. Þróun er þróun og það getur allt mögulegt komið upp. Ég verð því eiginlega bara að svara þessari spurningu á þann veg að allt mögulegt geti komið manni á óvart í framtíðinni. Ég veit hins vegar að ríkisstjórnarflokkarnir eru fullkomlega sammála og sáttir við að stíga þetta skref og munu taka á framhaldinu af ábyrgð.“
Sigríður Á. Andersen steig í pontu á ný:
Að menn hafa ekki hugmynd um hver réttaráhrif verða
„Já, ríkisstjórnin virðist vera samhent og sammála um að þetta mál fari í gegn eins og háttvirtur þingmaður sagði. Getur verið að ástæðan fyrir því sé sú að menn hafa ekki hugmynd um hver réttaráhrif lögfestingar þingmála eru? Háttvirtur framsögumaður málsins lýsir því hér yfir að hún hafi ekki hugmynd um hvort lögfestingin hafi einhver efnisréttindi eða auknar aðgerðir í för með sér. Frumvarpshöfundar voru ekki í neinum vafa. Það er kveðið skýrt á um það í frumvarpinu að lögfestingin kalli ekki á auknar aðgerðir, svo sem þróun þjónustuúrræða, og að lögfestingin feli ekki í sér ný efnisréttindi. Hvernig telur háttvirtur þingmaður og framsögumaður nefndarálitsins það standast þinglega meðferð og skuldbindingar gagnvart skattgreiðendum og fötluðu fólki að afgreiða svona mál án þess að nokkur viti nokkuð í sinn haus um hvaða afleiðingar það hafi en sendi röng skilaboð og mögulega villi um fyrir fötluðu fólki að þessi samningur og lögfesting samningsins hafi einhver efnisréttindi í för með sér?“
Og að lokum seinni ræða Kolbrúnar:
Þakkar fyrir skammirnar
Þakkaði fyrir skammirnar.
„Ég þakka háttvirtum þingmanni fyrir seinna andsvar og eiginlega skammirnar. Ekki var gert ráð fyrir að um væri að ræða ný efnisréttindi sem sveitarfélög þyrftu að leggja út fyrir. En það kom líka fram í gögnum að það væri erfitt að kostnaðarmeta réttaráhrif fyrir dómstólum og það er kannski það sem ég var að vísa í hér áðan. Svo er bara margt annað óvænt, ekkert endilega eingöngu varðandi þennan þátt, sem getur gerst í samvinnu. Við höfum séð það undanfarið að hér hefur ýmislegt dottið inn. Við höfum fengið faraldur og náttúruhamfarir og það er ýmislegt sem gæti kallað á allt mögulegt. Það er kannski það sem ég var að meina með að maður getur aldrei vitað alla hluti.
Ég vil að lokum fá að vísa svolítið til barnasáttmála Sameinuðu þjóðanna. Mér finnst við hafa getað lært heilmikið af því hvernig það allt saman var gert. Það er enn verið að innleiða hann í sumum sveitarfélögum og við erum enn þá að reka á eftir því. En mörg sveitarfélög eða nokkur allavega eru virkilega að standa sig vel í því. Ég vonast til þess að við förum hraðar í þetta ferli en það en þetta er samt til að styrkja okkur í þessari vegferð.“
