Sigurður Ingi Jóhannsson, formaður Framsóknar, og Daði Már Kristófersson fjármálaráðherra skiptust á skoðunum á Alþingi. Þeir tölujðu um óáreiðanleg gögn til útreikninga. Byrjum á Sigurði Inga:
„Varðandi atriðið sem mér finnst áhugavert að ræða hér í þingsal, af því að það er kannski ekki svo mikið af því gert þó að við höfum gert það í ríkisstjórn, þá var okkur eiginlega nóg boðið að horfa upp á að tölur sem við erum að vinna með virðast vera til alls staðar en hvergi nægjanlega góðar á einum stað.
Við höfum til að mynda verið með húsnæðismarkaðinn sérstaklega til skoðunar í þó nokkur ár. Þá horfum við upp á það að HMS, sem eru þá sérfræðingarnir á þessum markaði, eru með eitt sett af tölum; Seðlabankinn, sem fylgist með útlánum bankanna, er með annað sett af tölum yfir nákvæmlega sama hlutinn, en það sem er verst er að Hagstofan, en við byggjum fjárlögin á þeirra tölum, samkvæmt lögum, er með þriðja settið. Þetta gengur ekki.
Við höfum séð að gögn Hagstofunnar hafa ekki verið nægilega góð, það segir reynslan okkur, og tilhneiging einstakra stofnana til að byggja upp sínar eigin greiningardeildir og gagnavinnslu er mjög vond þróun. Við vorum að vinda ofan af henni með ákvörðunum á síðasta sumri í því að styrkja þá Hagstofugrunninn til þess að reyna að fá þessar upplýsingar allar á sama stað og þær væru eins gegnsæjar og skýrar og hægt væri. Það voru reyndar fleiri þættir sem við vorum að skoða þar líka, eins og varðandi fjármálaráð og fleiri þætti til þess einmitt að við værum með gögn sem við gætum rætt sem staðreyndir en ekki verið stöðugt með hártoganir um tölur hingað og þangað,“ sagði Sigurður Ingi Jóhannsson.
Daði Már steig því næst í pontu:
Það er dýrara fyrir íslenskt samfélag…
„Ég þakka háttvirtum þingmanni Sigurði Inga Jóhannssyni kærlega fyrir mjög hreinskilið svar. Það er mjög mikilvægt, þrátt fyrir að við séum ekki sammála um alla hluti og sitjum hvor sínum megin í þessum sal akkúrat í augnablikinu, að við horfum á það mikilvæga langtímaverkefni sem við hljótum öll að vera sammála um að reyna að leysa með sem bestum hætti, að taka ákvarðanir á grundvelli réttra gagna.
Ég vil þess vegna nota þetta tækifæri til þess að lýsa yfir ánægju minni með hreinskilni háttvirts þingmanns um þetta vandamál og einlægum vilja mínum til að vinna með þinginu að því að gera hér bragarbót. Það er dýrara fyrir íslenskt samfélag en stærri samfélög að gagnasöfnun og utanumhald sé dreift út um allt af því að við erum fá og það að vera með starfsfólk, einstaklinga, dreift um allt kerfið safnandi saman gögnum er fyrir okkur miklum mun dýrara en það væri fyrir tíu eða hundrað sinnum stærra samfélag. Þess vegna er hér, eins og háttvirtur þingmaður kom inn á, um ekkert sérstaklega spennandi en ákaflega mikilvægt verkefni að ræða. Ég ítreka því að samstarf um að gera á þessu bragarbót er gríðarlega mikilvægt svo að við háttvirtur þingmaður getum átt upplýstara og gagnlegra samtal þegar ég legg fram hallalausu fjárlögin á næsta ári.“
