Við værum að tefla stórum hluta af okkar útflutningi í hættu – enginn talar fyrir því að ganga út úr EES-samstarfinu

Alþingi, með og á móti:

Sigmar Guðmundsson, þingflokksformaður Viðreisnar, vék að Snorra Mássyni í ræðu á Alþingi í morgun. Snorri svaraði fyrir sig. Ræður þeirra eru hér. Fyrst Sigmars og síðan ræða Snorra.

Hingað til hefur það verið jaðarskoðun…

„Það hefur verið þannig í langan tíma í íslensku samfélagi að við höfum deilt um það hvort Íslendingar eigi að ganga í Evrópusambandið eða ekki. Um það eru gríðarlega skiptar skoðanir í samfélaginu og þess vegna hefur sú leið verið vörðuð af hálfu þessarar ríkisstjórnar að taka málið úr höndum stjórnmálaflokkanna og færa valdið og ákvarðanatökuna yfir til þjóðarinnar sjálfrar. Það er mjög góð leið en um þetta hefur vissulega verið deilt. Það hefur hins vegar ekkert sérstaklega verið deilt um EES-samninginn hingað til í íslensku samfélagi. Það hefur ekki verið mikil krafa um það innan atvinnulífsins að við segjum okkur úr EES. Verkalýðshreyfingin hefur ekki verið að tala um það sem hagsmunamál fyrir sitt fólk, að það sé gott fyrir okkur að ganga úr EES. Hvers vegna skyldi það vera? Það er jú nákvæmlega vegna þess, eins og háttvirtur þingmaður Pawel Bartoszek kom inn á hér rétt áðan, að samningurinn snýst um gagnkvæmni. Þegar við erum að tala um útlendinga sem hér dvelja á grundvelli samningsins verðum við að átta okkur á því að það er álíka stór hópur Íslendinga sem lifir og starfar og stundar nám innan EES-svæðisins á nákvæmlega sömu forsendum og útlendingarnir gera hér. Ef við færum úr EES, eins og nú er verið að viðra af forystu Miðflokksins, og ég ætla að gjalda mjög mikinn varhuga við þeirri umræðu, þá værum við að kippa fótunum undan tugþúsundum Íslendinga sem búa, vinna og stunda nám á Evrópska efnahagssvæðinu. Við værum að tefla stórum hluta af okkar útflutningi í hættu. Við værum að kalla yfir okkur tollavirki sem væri erfitt að brjótast í gegnum. Það er ofureinfaldlega staðreynd málsins.

Hingað til hefur það verið jaðarskoðun í íslensku samfélagi að við eigum að segja okkur úr EES-samstarfinu, og það er ástæða fyrir því að þetta hefur verið jaðarskoðun í íslensku samfélagi. Ég fagna því hins vegar að forysta Miðflokksins sé nú farin að tala skýrar um þetta en áður hefur verið. Það skýrir vissulega línurnar í íslenskri pólitík og gefur okkur færi á að ræða um alla þá kosti sem fylgja EES-samningnum. Við getum ekki tekið honum sem sjálfgefnum hlut.“

Og þá er komið að ræðu Snorra:

„Ég vildi koma hér upp til að vekja athygli á því að það er nú helst einn flokkur sem er skýrastur með það að vilja gera út af við EES-samstarfið og það er Viðreisn, með því að ganga inn í hnignandi sambandsríki Evrópusambandsins. En þar á bæ eru menn augljóslega að þyrla upp ryki í sínu eina máli sem er að framselja fullveldi okkar til Evrópusambandsins. Það er gott og vel, mögulega er það til þess að forðast umræðu um meiri háttar kosningasvik flokksins sem nú standa fyrir dyrum í 11 milljarða kr. skattahækkun á ökumenn, sem á að samþykkja hér fyrir jól.

Það er enginn að tala fyrir því að ganga út úr EES-samstarfinu.

Ökumenn eru almenningur og við erum ekki hrædd við að ræða hagsmuni almennings, líka í sambandi við EES-samstarfið. Ég hef sagt að innflytjendum hafi fjölgað of hratt og ég talaði fyrir því hér í þinginu í gær að ef þetta héldi svona áfram þyrftum við auðvitað að skoða það hvort við beittum okkar sérstöku ákvæðum, sem við börðumst fyrir innan EES-samningsins, til að ná stjórn á þeirri þróun. Og svo sagði ég að ef mönnum leyfðist það ekki og innflytjendum væri að fjölga hér, til framtíðar og áratugum saman, mun hraðar, meira en tvöfalt hraðar, en Íslendingum, þá kynni að koma til þess að við myndum meta málið þannig að hagsmunum okkar væri betur borgið utan bandalags sem neyðir okkur inn í slíka þróun. Auðvitað segi ég það fullum fetum.

Ef maður ræðir hagsmuni íslensks almennings gagnvart þessari þróun í innflytjendamálum — hvort sem það er út frá þjóðmenningu, tungumáli, launaþrýstingi, af því að menn nefna verkalýðshreyfinguna, húsnæðismarkaði, skólakerfi, leikskólakerfi — og segist vera tilbúinn til að gæta þessara hagsmuna íslensks almennings er það þá eina svarið hjá fólki að fara í hræðsluáróður um að þar með sé maður að tala um að fórna og varpa fyrir róða einhverjum heilögum réttindum Íslendinga, sem eru fín réttindi og góð og EES-samningurinn veitir okkur þau? Það er enginn að tala fyrir því að ganga út úr EES-samstarfinu, en við erum að tala fyrir því að meta framtíðarhagsmuni íslensku þjóðarinnar. Ég ætlaði að koma að frekari þáttum í þessu máli en vísa því alfarið á bug hvernig háttvirtir þingmenn Viðreisnar hafa verið að ræða þetta mál hér í dag.“