Allt sem heitir samvinna og samkomulag finnst ekki á fundum forsætisnefndar
„Það er engin hemja hvernig fundir forsætisnefndar eru oft hvað varðar fundarsköp. Síðasti fundur var óhemju slæmur. Fyrir fundinum lágu 11 dagskráliðir en sjö af þeim var frestað eftir að dólað hafði verið með fyrstu málin. Til að forðast nokkra umræðu um frestun mála flýtti formaðurinn sér að slíta fundi.“
Kolbrún Baldursdóttir, Flokki fólksins, bókar þannig á fundi borgarstjórnar.
Hún mótmælir vinnubrögðunum og telur þetta enn eitt dæmið um valdníðslu meirihlutans á fundum.
„Sambærilegir hlutir hafa oft gerst áður. Svona getur þetta varla átt að vera. Þetta veldur pirringi og gremju þar sem aldrei er þess freistað að ná samkomulagi með eitt eða neitt við fulltrúa minnihlutans t.d. að semja um hvaða málum skuli frestað.“
Meirihlutaflokkarnir svara svo sem ekki gagnrýni Kolbrúnar um hægaganginn, en bókuðu þó þetta:
„Fundi forsætisnefndar 31. maí var slitið korteri eftir að auglýstum fundartíma átti að ljúka. Það er sameiginleg ábyrgð allrar forsætisnefndar að virða fundartíma. Stundum setur forseti margt á dagskrá ef ske kynni að umræða gangi greitt fyrir sig. Ef svo er ekki verður að fresta málum svo málin fá tilhlýðilega umræðu og rými. Það er heimild fyrir því að fresta og eðlileg vinnubrögð að reyna að halda fundartíma af virðingu við tíma allra viðstaddra.“
„Allt sem heitir samvinna og samkomulag finnst ekki á fundum forsætisnefndar og stundum ekki heldur á öðrum fundum. Borgarfulltrúa Flokks fólksins finnst þetta ekki boðlegt og krefst þess að annar háttur verði hafður á í framtíðinni og borin sé einhver lágmarks virðing fyrir minnihlutafulltrúum og málum þeirra sem lögð eru fram á fundinum,“ þannig endaði Kolbrún sínar athugasemdir.
