- Advertisement -

Að breyta fallegum og friðsælum bæ í stóriðnaðarþorp

„Aðeins um þriðjungur starfsmanna mun búa á svæðinu.“

Litla-Sandfell.

Alþingi „Hamingja er ekki bara orð. Hamingja er undirstaða lífsgæða okkar. Flokkur fólksins lætur sig lífsgæði fólks varða. Því er ég hér til að lýsa áhyggjum vegna fyrirætlana bæjaryfirvalda í heimabæ mínum, Þorlákshöfn,“ sagði Elín Íris Fanndal, íbúi í Þorlákshöfn og varaþingmaður Flokks fólksins.

„Undanfarin ár hefur verið unnið að því að flytja úr landi fjallið Litla-Sandfell í Þrengslum. Stórfyrirtækið Heidelberg, sem hefur skilið eftir sig sviðna jörð víðs vegar um heiminn, stefnir að því að hefja efnistöku þar og mylja fjallið niður í sementsíblöndunarefni í verksmiðju sem reist verður í túnfæti Þorlákshafnar. Þá hafa efnahagsleg áhrif verkefnisins verið stórýkt. Fyrir liggur að fjöldi starfa við þessa verksmiðju er ekki umtalsverður. Helst yrði um að ræða sérfræðistörf sem heimamenn verða væntanlega flestir ekki ráðnir til að sinna. Aðeins um þriðjungur starfsmanna mun búa á svæðinu,“ sagði Elín Íris.

Þú gætir haft áhuga á þessum
Mynd af væntanlegu landeldi við Þorlákshöfn.

„Nú liggur fyrir að áformin stangast með beinum hætti á við áform fyrirtækisins First Water sem hyggst byggja upp landeldi á svipuðu svæði. Valið stendur því í dag á milli þess að reisa grjótmulningsverksmiðju eða skapa náttúruvæna atvinnu með því að reisa landeldi sem mun draga úr þörfinni fyrir sjókvíaeldi, sem við erum flest sammála um að sé til bóta. Fólk flytur til Þorlákshafnar til að flytja í hamingjuna en hamingjan er víðs fjarri nú vegna stefnu meiri hlutans í bæjarstjórn. Það virðist unnið að því bæði leynt og ljóst að fyrirtæki sem státar af þyrnum stráðri fortíð breyti okkar fallega og friðsæla bæ í stóriðnaðarþorp. Meiri hluti bæjarstjórnar Ölfuss ákvað aðeins 15 klukkustundum áður en kosning átti að hefjast að fresta íbúakosningu um áform Heidelbergs, sennilega til að kaupa sér tíma til að fegra betur málstað sinn, enda lá fyrir að íbúar myndu ekki samþykkja þessi áform. Það er miður að lýðræðislega kjörnir fulltrúar sveitarfélagsins hafi ekki treyst eigin kjósendum til ákvarðanatöku í þessu máli.“ 


Auglýsing

Tengdar fréttir sem þú gætir haft áhuga á að lesa: