Gripið til ósanninda eða hálfsannleiks

„Nú er hún Snorrabúð stekkur. Nú stekkur hver Sjálfstæðismaðurinn fram um annan þveran til þess að koma í veg fyrir að þjóðin fái að ráða sinni framtíð.“

Benedikt Jóhannesson.

Benedikt Jóhannesson, stofnandi Viðreisnar og fyrrum félagi í Sjálfstæðisflokknum, skrifaði:

„Innganga Íslands í NATÓ á sínum tíma var mikið gæfuspor. Það sama má segja um inngönguna í EFTA og aukaðildina að Evrópusambandinu í gegnum EES-samninginn.

Alltaf héldu andstæðingar aðildar því fram að í samningunum fælust svik og landráð. Þau orð eru enn þann dag í dag minnisvarðar um þröngsýni þeirra sem töldu Íslendinga ekki mega koma fram í alþjóðasamstarfi sem fullvalda þjóð sem gæti og þyrði að vinna með öðrum þjóðum, öllum til heilla.

Nú stekkur hver Sjálfstæðismaðurinn…

Í hvert einasta skipti gripu andstæðingar til ósanninda eða hálfsannleiks. Slíkt er einkenni þeirra sem reyna að verja rangan málstað. Það var gæfa Íslands að á þessum tímum var stærsti flokkurinn, Sjálfstæðisflokkurinn, í fararbroddi þeirra sem börðust gegn varnarleysi og einangrunarhyggju.

Nú er hún Snorrabúð stekkur. Nú stekkur hver Sjálfstæðismaðurinn fram um annan þveran til þess að koma í veg fyrir að þjóðin fái að ráða sinni framtíð. Nú má þjóðin ekki lengur hugsa um fulla aðild að Evrópusambandinu, hvað þá gera eitthvað í málinu.

Einn fyrrverandi þingmaður flokksins hefur þó skapað sér sérstöðu. Vilhjálmur Bjarnason skrifar í Morgunblaðið:

„Rit­ari [þ.e. Vilhjálmur] biður um vit­ræna um­fjöll­un

Rit­ari hef­ur látið af af­skipt­um af stjórn­mál­um. Engu að síður ber hann þó fram þá frómu ósk að umræða um Evr­ópu­sam­vinnu og alþjóðlega sam­vinnu bygg­ist á vit­ræn­um grunni en ekki þjóðrembu með málæði. Öll sam­vinna bygg­ist á því að láta af hendi og taka á móti. Í sam­vinnu verður til gagn­kvæm­ur ávinn­ing­ur beggja samn­ingsaðila.

Íslend­ing­ar telja sig verndaða af varn­ar­samn­ingi við Banda­rík­in. Óvíst er um hald í slík­um samn­ingi með ólík­indatól á for­seta­stóli í Banda­ríkj­un­um.

Nú eru ógn­ir ekki leng­ur aðeins hernaðarlegs eðlis. Það er al­veg út í blá­inn að ræða sam­vinnu við ríki á EES-svæðinu um þessi mál, enda nær EES-samn­ing­ur fyrst og fremst til viðskipta.“

Greinina birti Benedikt á Facebook.