Hver er árangurinn af ráðstöfun þessa fjár? 144 milljarðar og 300 milljónum betur gætu borgað fyrir margvísleg þörf verkefni.
Karl Gauti Hjaltason.
„Fyrir nokkru barst mér svar hæstvirtum umhverfis-, orku- og loftslagsráðherra þar sem ég spurði hver væru útgjöld íslenska ríkisins til loftslagsmála. Ég greindi frá því í ræðu í síðustu viku hverjar þessar fjárhæðir væru en þær munu vera 28.000 milljónir á hverju ári næstu fjögur árin. Þetta eru engir smáaurar og því bara eðlilegt að spyrja hvert allir þessir fjármunir renna. Svarið var rýrt því nefndar voru ýmsar stofnanir sem koma að loftslagsmálum og fá fjármuni, bæði með beinum og óbeinum hætti, allt með það að markmiði að draga saman losun gróðurhúsalofttegunda, auk aðila sem ekki voru nefndir og fá fjármuni í gegnum millifærslur og styrki,“ sagði Karl Gauti Hjaltason þingmaður í Miðflokki.
„Ég tel mér heimilt að gera þá kröfu, frú forseti, þegar spurt er um ráðstöfun opinberra fjármuna sem almenningur og fyrirtæki greiða til ríkisins í formi skatttekna að það liggi fyrir nákvæmlega hvert þessir fjármunir renna. Ekki er síður mikilvægt að benda á þá augljósu kröfu að veittar séu upplýsingar um hvort tilætlaður árangur hafi náðst og hvernig sá árangur er mældur. Þau svör liggja ekki fyrir. Hver hefur árangurinn verið á undanförnum árum þegar rúmlega 144.000 millj. kr. hefur verið varið í þennan málaflokk? — nákvæmlega, frú forseti. Hver er árangurinn af ráðstöfun þessa fjár? 144 milljarðar og 300 milljónum betur gætu borgað fyrir margvísleg þörf verkefni, þar á meðal sjúkrastofnanir og aukna löggæslu.
Ég ítreka spurningar mínar: Hvert hefur þetta fé runnið og hverju hefur þetta skilað? Hverjir eru viðtakendur þessa fjár? Hver er árangurinn á viðurkennda mælikvarða?“
