Segir launabaráttuna vera skemmdarverk.
Mogginn nýtir, sem fyrr, hvert tækifæri til að hnýta í forystufólk launþega. Nú er þeim kennt um að bílaleigur kaupa færri bíla en áður. Samt kaupa þær glás af bílum. Það vantar ekki.
„Forystumenn fáeinna verkalýðsfélaga láta sér fátt um finnast. Þeir láta eins og hótanir þeirra hafi engin áhrif haft og að aðgerðir sem nú hafa verið boðaðar hafi ekki alvarleg áhrif heldur. Efnahagslífið muni einfaldlega halda áfram að vaxa og dafna án tillits til skemmdarverkastarfsemi nokkurra áhrifamikilla aðila í hagkerfinu,“ segir í leiðara Moggans.
„Efnahagslífið er viðkvæmt um þessar mundir,“ segir einnig í leiðaranum. Það er vægt til orða tekið ef horft er til efnahagslífsins hjá fólkinu á lægstu laununum og fólkinu sem býr við ofurskatta, milli áttatíu og hundrað prósent skatta. Það eru hluti eldra borgara og allir öryrkjar.
Mogginn er samur við sig og mænir í sömu átt og áður: „Sú atvinnugrein sem átt hefur stóran þátt í að lyfta landinu upp úr efnahagserfiðleikum verður nú fyrir þungu höggi er um leið ljóst að niðursveiflan getur orðið allt annað en veg.“
Það er nefnilega það. Að baki ferðaþjónustunni er láglaunafólk sem vill ekki og getur ekki lifað af þeim launum sem Djúpríkið skammtar fólkinu. Það er komið að leiðarlokum í þeim fantaskap.
