Vilhjálmur Birgisson formaður SGS skrifar:
Ísland er land dýrasta peningsins – ekki vegna verðbólgu, ekki vegna náttúrulögmála, heldur vegna þess að stjórnvöld hafa valið að verja fjármálakerfið og fórna heimilunum.
Ísland er í dag með hæstu raun stýrivexti í Evrópu – 3,5%.
Í Finnlandi eru þeir 0,25%, í Bretlandi 0,2% og í Danmörku eru þeir jafnvel neikvæðir (-0,7%).
Það þýðir að íslensk heimili og fyrirtæki búa við gólfið sem allt vaxtakerfið hvílir á sem er 14–17 sinnum hærra en í nágrannalöndunum.
En þetta er ekki nýtt. Þetta er ekki tilfallandi. Þetta er ekki einhvers konar slys.
Þetta hefur verið svona ár eftir ár, áratug eftir áratug. Það má fara 30 ár aftur í tímann og staðan er alltaf sú sama:
Hæstu raun stýrivextirnir á Íslandi.
Heimilin og neytendurnir sem bera byrðarnar.
Bankarnir og fjármálakerfið sem fá að sitja undir skjaldborg stjórnvalda.
Og spurningin sem stjórnvöld og Seðlabankinn verða að svara er þessi:
- Hví er þetta látið viðgangast?
- Hví er ætíð sleginn skjaldborg um fjármálakerfið?
- Hví er heimilum og neytendum ítrekað fórnað á blóðugu altari okurvaxta fjármálakerfisins?
- Hví á almenningur alltaf að bera byrðarnar á meðan bankarnir tryggja sér gróða?
Þetta er ekki „stöðugleiki“ – þetta er kerfisbundið níð sem hefur verið viðhaldið af stjórnvöldum og Seðlabankanum í áratugi.
Ísland er land dýrasta peningsins – ekki vegna verðbólgu, ekki vegna náttúrulögmála, heldur vegna þess að stjórnvöld hafa valið að verja fjármálakerfið og fórna heimilunum
