Til hamingju Ísland með flokkana sem leiða Sjálfstæðisflokkinn til valda hvað eftir annað.
Oddný Harðardóttir skrifar:
Sjálfstæðisflokknum er ekki treystandi fyrir hagstjórninni. Hvað eftir annað enda þeirra ráð með kostnaði á almenning og niðurskurði í velferðarkerfinu.
Þegar þeir tóku við stjórnartaumunum aftur eftir hrun 2013 með Framsókn, þá lækkuðu þeir skatta og veiðigjöld og réttu rúmar 70 milljarða fólki sem lang flest þurfti ekkert á þeim að halda, undir yfirskini svokallaðrar leiðréttingar. Vegir, skólar og heilbrigðisstofnanir, innviðir samfélagsins, liðu fyrir ranga forgangsröðun. Í stað þess að safna til mögru áranna í uppsveiflunni og slakanum í efnahagslífinu sem þá var og búa innviði undir niðursveiflu, þá breyttu þeir skattbyrðinni þannig að þeir efnameiri högnuðust á kostnað hinna og skildu innviðina eftir vanrækta.
Og hvað gera þeir svo núna í niðursveiflunni? Jú – skera niður í velferðinni. Þeir sem þurfa á stuðningi og þjónustu ríkisins að halda taka niðursveifluna. Þeir hinir sömu sem ekki fengu að njóta góðærisins. Þeim dettur ekki í hug að skattleggja auðmenn eða sækja fullt verð fyrir auðlindirnar. Til hamingju Ísland með flokkana sem leiða Sjálfstæðisflokkinn til valda hvað eftir annað.
Hverjum treystir þú spyr ég nú bara.
