„Við megum ekki gleyma því að veiðigjöld eru ekki aðeins fjárhagsleg tæki, þau eru siðferðisleg yfirlýsing. Þau endurspegla þá trú okkar að auðlindanýting eigi að byggjast á ábyrgð, gagnsæi og réttlæti. Með skynsamlegri og sanngjarnri gjaldtöku leggjum við grunn að sjálfbærri framtíð sjávarútvegsins og réttlátara samfélagi. Þetta er mikilvægt skref í átt að samfélagslegri sátt um nýtingu náttúruauðlinda. Með því að tryggja að auðlindir þjóðarinnar skili verðmætum til allra eflum við lýðræðislega ábyrgð og styrkjum samheldni þjóðarinnar,“ sagði Grímur Grímsson Viðreisn í lok ræðu sinnar á Alþingi.
„Við stöndum frammi fyrir einni af mikilvægustu spurningum samtímans: Hvernig tryggjum við að auðlindir þjóðarinnar séu nýttar á réttlátan og sjálfbæran hátt í þágu alls samfélagsins? Veiðigjöld gegna þar lykilhlutverki. Þau spegla grundvallarhugmyndir okkar um réttlæti, jöfnuð og samfélagslega ábyrgð. Þau minna okkur á að fiskstofnar landsins eru sameign þjóðarinnar og arðurinn sem af þeim hlýst á að renna til samfélagsins alls, ekki aðeins fárra aðila.
Virðulegi forseti. Með því frumvarpi til breytinga á lögum um veiðigjöld sem hæstvirtur atvinnuvegaráðherra, Hanna Katrín Friðriksson, mælti fyrir hér á Alþingi höfum við stigið stórt og mikilvægt skref í átt að réttlátari skiptingu arðs af sjávarauðlindinni, verði það að lögum. Breytingarnar miða að því að gjöldin endurspegli betur raunverulegt aflaverðmæti. Það stuðlar að auknu gagnsæi, meiri sanngirni og traustari tengslum milli atvinnugreinarinnar og almennings.
En það er ekki nóg að horfa á heildina. Við verðum líka að huga að fjölbreytileikanum innan greinarinnar. Þess vegna er það fagnaðarefni að frítekjumark fyrir litlar og meðalstórar útgerðir hafi verið hækkað. Með því er tryggt að minni aðilar fái svigrúm til að vaxa og dafna án þess að gjaldtakan verði þeim íþyngjandi um of. Þetta styrkir byggðir landsins og stuðlar að fjölbreyttari og sjálfbærari atvinnuuppbyggingu. Þær breytingar sem gert er ráð fyrir að gerðar verði á gjaldstofni veiðigjaldsins munu leiða til hærri tekna ríkissjóðs. Þær tekjur munu m.a. nýtast til að fjármagna mikilvæga innviði og grunnstoðir samfélagsins. Þannig fær þjóðin sjáanlegan ávinning af því að leigja auðlind sína í formi betri þjónustu, aukins jöfnuðar og sterkari samfélaga.“
