- Advertisement -

Verðlag: Sakar ASÍ um falska verðkönnun

Matarkarfan hér 11% ódýrari en í Noregi.

Konráð S. Guðjónsson, hagfræðingur Viðskiptaráðs, er ekki sáttur með verðkönnum ASÍ um verðlag hér og á hinum Norðurlöndunum. Þar kom fram að verð hér er 67 prósentum hærra en í Helsinki.

Konráð segir ASÍ ekki hafa hvorki farið faglega né heiðarlega að.

„Niðurstöður könnunarinnar eru mjög á skjön við opinberar hagtölur eða staðlaðar verðlagsmælingar Hagstofu Evrópu (Eurostat) eins og þær birtast í samræmdri vísitölu neysluverðs. Það bendir sterklega til þess að könnun ASÍ gefi upp skakka og villandi mynd af samanburði matvöruverðs milli landa,“ skrifar Konráð.

Þú gætir haft áhuga á þessum

Konráð segir að Eurostat taki saman gögn um hlutfallslegt verðlag milli landa og að þau nái til ársins 2017. „Með samræmdri vísitölu neysluverðs, sem hlutfallslega verðlagið byggir á, og breytingar á gengi gjaldmiðla er þó lítill vandi að áætla hvert verðlagið var í desember síðastliðnum. Slíkur samanburður leiðir í ljós að matarkarfan og neyslukarfan almennt er ekki dýrust hér á landi af Norðurlöndunum. Til að mynda er matarkarfan hér 11% ódýrari en í Noregi en aðeins 17% dýrari en í Finnlandi.“

Hann segir næst að þó að kannanir á einstökum vörutegundum, einstakra aðila, geti verið gagnlegar þá koma þær aldrei í staðinn fyrir tölfræði sem safnað er á skipulagðan hátt með fræðilegum aðferðum. „Með útgáfu á við þá sem ASÍ birtir er ryki slegið í augu almennings.“

Og svo þetta: „Að horfa einvörðungu á verðlagið segir einungis hálfa söguna. Það sem skiptir máli þegar upp er staðið er kaupmáttur, hversu mikið af vörum og þjónustu fólk getur keypt fyrir tekjurnar. Í því samhengi má minna á að kaupmáttur launa á Íslandi árið 2017 var sá hæsti meðal Norðurlandanna samkvæmt OECD. Lægsta matvöruverð í Evrópu finnst í Rúmeníu og Makedóníu en efast má um að ASÍ eða aðrir vilji skipta á kaupmætti við þau lönd.“

Að lokum skrifar Konráð: „Burtséð frá ýktum og villandi tölum ASÍ er það mat Viðskiptaráðs að auka má samkeppni á matvörumarkaði t.d. með afnámi tollverndar og breytingum á stuðningskerfi landbúnaðar. Þannig má ná fram lægra matvöruverði – stefnum þangað.“


Booking.com

Auglýsing

Tengdar fréttir sem þú gætir haft áhuga á að lesa: