Stjórnmál: Regína Ásvaldsdóttir skrifaði:
Í gær var fyrsti dagurinn í nýju lífi – sem frambjóðandi í sveitarstjórnarkosningunum í vor. Ég ætlaði að hefja það tímabil með greinarskrifum þar sem ég fer yfir það hversvegna ég valdi Samfylkinguna. Viðtalið á Vísi við Soffíu Hjördísi sem stýrir málaflokki heimilislauss fólks í Reykjavík og ég birti hér á facebook síðunni kjarnar í raun ástæðu þess að ég vel jafnaðarmannaflokk. Ég treysti því einfaldlega að grunnstefið, að allir eigi að fá tækifæri og séu jafn verðmætir sé best varðveitt í þeim flokki.
En það var önnur grein sem birtist á Vísi í vikunni sem var fylgt eftir með viðtali á Bylgjunni í gær sem fékk mig til að skrifa grein um kostnað við borgarstjórn Reykjavíkur. Greinarhöfundur og viðmælandi í Bítinu er lögfræðingur viðskiptaráðs og gengur fram með þá kenningu að kjör borgarfulltrúa hafi áhrif á það að miðlægur kostnaður Reykjavíkurborgar sé hærri en í öðrum stærri sveitarfélögum á suðvestur horninu en birtir ekki gögn um raunverulegan kostnað við borgarstjórn og bæjarstjórnir. Kostnaður við borgarstjórn Reykjavíkur er einfaldlega með þeim lægri á landinu og því svara ég í þessari grein sem birtist á Vísi í gærkvöldi. Það er hægt að hafa allskonar skoðanir á því hvernig fyrirkomulagið á að vera – en það verður enginn sparnaður í kostnaði við kjörna fulltrúa í Reykjavík með að fara gömlu leiðina með miklu fleira fólki í nefndum og ráðum í aukastarfi.
…það er ekki þessvegna sem ég skrifa greinina heldur vegna áróðursins sem bylur endalaust yfir…
Þetta er ekki mitt hjartans mál – það er ekki þessvegna sem ég skrifa greinina heldur vegna áróðursins sem bylur endalaust yfir, þar sem reynt er að gera því skóna að fjárhagur borgarinnar sé í verstu málunum á Íslandi. Það er einfaldlega rangt!
Miðlægur kostnaður hefur aukist í borginni meðal annars vegna þess að það var tekin ákvörðun um að setja aukið fjármagn í upplýsingatækni og fara í umfangsmikla stafræna umbreytingu. Hjá Reykjavíkurborg er því allur slíkur kostnaður skráður á miðlæga stjórnsýslu.
Sveitarfélögin eru í dag með mismunandi form á því hvar kostnaður birtist og samband íslenskra sveitarfélaga vinnur nú að því að samræma betur hvernig hvaða útgjöld eru lykluð í sveitarfélögunum. Eini raunverulegi mælikvarðinn á rekstur sveitarfélaga er heildarkostnaður pr. íbúa auk helstu lykiltalna í ársreikningi. Taflan á myndinni sem er úr mælaborði sambands íslenskra sveitarfélaga sýnir kostnað við laun og rekstur vegna borgar og bæjarfulltrúa í þeim sveitarfélögum sem viðskiptaráð fjallar um í fyrrnefndri grein.
