Víst er að það verður hvorki Mogginn né Ásmundur Stefánsson.
Mogginn dregur Ásmund Stefánsson, fyrrverandi hitt og þetta, og þar á meðal fyrrverandi sáttasemjara á flot. Þar fann Mogginn einn sem talar sama máli og blaðið sjálft. Ásmundur og Mogginn fullyrða út í eitt. Stóridómur Ásmundar er að allir aðrir en hann, og kannski Mogginn, séu bölvaðir asnar.
Öll helstu samtök launafólks hafa mótmælt gjörðum Aðalsteins Leifssonar ríkissáttasemjara sem óhæfum. Í þeim hópi eru líka félög og einstaklingar sem hafa lagt fæð á Eflingu og Sólveigu Önnu. Hún og Efling hafa fengið fádæma stuðning í þeirri stöðu sem nú er uppi.
„Ég hef ekki nokkra ástæðu til annars en að treysta því að hans dómgreind sé þokkaleg. Allavega er það hreinlega skylda hans að leggja fram miðlunartillögu ef hann metur sem svo,“ segir Ásmundur við Moggann blessaðan.
Með því sem hefur orðið síðustu daga er málið komið í rembihnút. Enn er óljóst hvernig og þá hvenær verður búið að leysa hann og hver gerir það. Víst er að það verður hvorki Mogginn né Ásmundur Stefánsson.
