Bergþór Ólason Miðflokki er án vafa „foringi“ stjórnarandstöðunnar. Hér má lesa eina af ræðum hans um veiðigjöldin. Kíkjum aðeins í pakkann:
„Hér er sömuleiðis kafli um áhrif á fjárfestingargetu, nýsköpun og samkeppnishæfni íslensks sjávarútvegs. Þeir þingmenn sem halda því fram að mál sem dregur fram jafn mikla skattahækkun og hér um ræðir hafi ekki áhrif á fjárfestingargetu annars vegar og fjárfestingarvilja hins vegar eru á einhverjum villigötum, er ég hræddur um, í mati sínu á málinu. Raunheimar bara kenna okkur þetta. Við sjáum áhrifin sem sú óvissa sem ríkisstjórn Jóhönnu Sigurðardóttur og Steingríms J. Sigfússonar leiddi yfir sjávarútveginn. Fjárfestingar í sjávarútvegi á þeim tíma fóru með merkjanlegum hætti niður, féllu eins og steinn í raun.“
Hér verðum við að stoppa aðeins. Hvort var það bankahrunið, með öllum sínum afleiðingum, eða Jóhanna og Steingrímur, sem urðu til þess að afturkippur kom í fjárfestingar. Hér er fullyrt að hrunið hafi skipt meiru en rústabjörgun Jóhönnu og Steingríms.
Jæja aftur til Bergþórs:
Við verðum að vera samkvæm sjálfum okkur…
„Þetta eru áhrifin. Fólk og fyrirtæki haga sér á þann máta sem regluverkið hvetur þau helst til. Þegar svona skattahækkun er keyrð í gegn, illa ígrunduð, ef það verður nú niðurstaðan, sem ég vona að verði ekki, þá hefur það gríðarleg áhrif á ákvarðanir. Við sjáum það í því sem tæknifyrirtækin, sem stunda vöruþróun og nýsköpun í þessum geira, segja varðandi samninga sem hefur verið frestað að taka afstöðu til og verkefna. Þetta hefur allt saman áhrif. Við segjum hér í einu orðinu að við viljum að útgerðin bæti og yngi upp fiskiskipaflota sinn en síðan í hinu þá tökum við fjárfestingargetuna af með aðgerð eins og þessari. Við verðum að vera samkvæm sjálfum okkur í þeim skilaboðum sem við sendum atvinnulífinu og svo sem öllum, en sérstaklega skiptir þetta máli þegar við erum að eiga við rekstrarskilyrði, ég leyfi mér að segja, mikilvægrar undirstöðuatvinnugreinar Íslands, sem er ekki bara undirstaða atvinnu, fyrst og fremst á landsbyggðinni, verðmætasköpunar og þar fram eftir götunum, heldur er líka mikilvægasta útflutningsgreinin sem tryggir okkur þá stöðu sem við höfum hvað varðar styrk gjaldmiðils og annað í þá veruna. Það er bara mjög alvarlegt ef við köstum til hendinni varðandi mat á atriðum sem þessum.“
Hvert og eitt okkar verður að leggja sinn skilning í orðasalat foringja stjórnarandstöðunnar á Alþingi.
