Útgerðarkonan og Ólafsfirðingurinn, Sigurbjörg Áróra Ásgeirsdóttir, skrifar Mogganum til að freista þess að fá leiðréttingu á röngum fréttum þar sem Sigurbjörg kemur við sögu.
Miðjan hefur textann úr bréfinu sem Sigurbjörg Áróra skrifaði Mogganum og einkum blaðakonunni Andreu:
„Sæl Andrea. Sökum skrifa Morgunblaðsins um málefni mér tengd og viðskipti sem ég átti fyrir all nokkru síðan þá vil ég koma eftirfarandi á framfæri.
Ég keypti allan hlut Sigurjóns Þórðarsonar í Sleppu ehf. nú fyrr í vor og að auki keypti ég hlut af eiginkonu hans, þannig að ég á nú rúman meirihluta í félaginu. Sigurjón hefur enga aðkomu að rekstri félagsins eða stjórnun.
Ég lærði skipstjórn í Færeyjum sl. 4 ár og hef lokið þaðan námi í skipstjórn, bæði til stjórnunar fiskiskipa, vöruflutningaskipa og má fara með stjórn varðskipa og það er ætlun mín að leggja fyrir mig sjómennsku. Það hef ég gert síðan ég lauk prófum frá Vinnuháskólanum í Þórshöfn og hef m.a. verið stýrimaður á þjónustuskipum við laxeldi við Skotland og eins hef ég haft pláss á íslenskum fiskveiðiskipum.
Amma mín, Sæunn Axelsdóttir réri héðan frá Ólafsfirði á smábátum á sínum tíma, þannig að ég á etv. ekki langt að sækja þennan áhuga minn á sjónum. Ég er búsett og með lögheimili í Ólafsfirði og stefni að því að róa á strandveiðar í sumar og eignast félagið Sleppu ehf. að fullu sjálf.
Í augnablikinu er Sigurlaug ÓF 38 á landi hjá JE – vélaverkstæði á Siglufirði, þar sem verið að sinna nauðsynlegu viðhaldi áður en ég fer af stað. Ef það bætir eitthvað úr skák, þá kaus ég Sjálfstæðisflokkinn í síðustu kosningum, reyndar eins og ég hef alltaf gert.
Með vinsemd og virðingu,
Sigurbjörg Áróra Ásgeirsdóttir
-útgerðarmaður.“