„…í grunninn er RÚV enn þá 1930-módelið plús litasjónvarp, plús Rás 2. Það gerist afskaplega lítið í framfaraátt þar. Þess vegna eigum við að leyfa fólki að velja.“
Þorsteinn Sæmumdsson á Alþingi.
„Þessi umræða hér er í sjálfu sér afskaplega gamaldags vegna þess að þessi redding sem er verið að framkvæma hér núna, svona skítaredding, er náttúrlega úr takti við það sem er að gerast í raunveruleikanum. Það má segja að hver og einn geti orðið fréttauppspretta ef honum svo dettur í hug af því einfaldlega að tæknin er komin það langt og fjöldi fólks horfir ekki lengur á línulega dagskrá. Það er kannski rétt að koma bara heiðarlega fram strax og segja: Ég er í grundvallaratriðum á móti því að styrkja svokallaða frjálsa fjölmiðla með almannafé og ég segi líka: Hvernig verða slíkir miðlar frjálsir eftir að þeir eru komnir á spena ríkisins? Það er enginn sem bítur í lúkuna sem réttir honum mat nema það komi upp staða eins og að einhver fái geðshræringu yfir einhverjum fréttum í einhverjum miðlum og þá kemur geðþóttinn og þá eru bara lækkuð til þeirra framlögin frá því sem áður var. Þetta er náttúrlega afskaplega klént,“ sagði Þorsteinn Sæmundsson, varaþingmaður Miðflokksins, í vor þegar rætt var um ríkisstyrki til fjölmiðla.
Málið dagaði uppi og fer þá væntanlega á dagskrá þingsins á nýjan leik.
Aðeins meira úr ræðu Þorsteins, sem er ræðumaður góður:
„Ríkisútvarpið er ohf. og ég ætla að segja það enn þá einu sinni héðan úr þessum stól að ohf. eru stjórnskipulegir bastarðar. Það er ekki nokkur einasta leið að hafa hald á þeim með nokkru móti og sést núna hjá öðru ohf.-i suður á nesi. Hvað getum við þá gert? Jú, við getum gert það að verkum að þeir fjölmiðlar sem eru að keppa við þetta opinbera hlutafélag eigi einhvern möguleika með því að laða til sín viðskiptavini, þ.e. ef við leyfum viðskiptavinunum að ákveða að þeir fái þeirra framlag. Að því leyti erum við samt að eltast við eiginlega löngu liðinn tíma því ef við horfum bara á nærumhverfi okkar þá eru, alla vega að mati þess sem hér stendur, að mörgu leyti merkilegustu fréttaskýringar eða þættir um þjóðfélagsmál, sem maður sér, úr hlaðvörpum. Tæknin er komin langt á undan okkur og Ríkisútvarpið ohf., sem var reyndar ekki ohf. þá, var náttúrlega mikið þjóðþrifafyrirtæki eða -stofnun árið 1930 þegar það var stofnað. En í grunninn er RÚV enn þá 1930-módelið plús litasjónvarp, plús Rás 2. Það gerist afskaplega lítið í framfaraátt þar. Þess vegna eigum við að leyfa fólki að velja.“
