Guðmundur Franklín rennir hýru auga til Bessastaða. Aftur og nýbúinn. Guðmundur ætlaði sér í forsetaframboð árið 2016. Þegar Davíð Oddsson, sællar minningar, bauð sig fram, hætti Guðmundur við. Vildi ekki etja kappi við Davíð eða hugsanlega hafa af honum atkvæði. Barasta alls ekki.
Nú eygir Guðmundur Franklín tækifæri. Nema Davíð reyni enn og aftur. Þar verður að teljast ólíklegt. Helstu kosningaloforð Davíðs voru að vera forseti kauplaust og fara ekki til útlanda. Fara ekki til útlanda. Það sama og hann gerði þegar hann var utanríkisráðherra.
Hvað er þetta eiginlega. Ég ætlaði að fjalla um Guðmund Franklín Jónsson, kannski næsta forseta Íslands, en ekki um Davíð. Hann ryðst eiginlega á takkaborðið. Tilefnið er svo sem ágætt. Að rifja upp síðustu forsetakosningar. Og 13,7 prósentin frægu.
Já, Guðmundur Franklín. Hann er ágætis sómamaður. Víst er og öruggt að fleiri eiga eftir að horfa til Bessastaða. Þannig að leiðin er ekki greið fyrir Guðmund Franklín. Og ekki má gleyma að forsetinn vill sitja áfram. Öruggt er að fleiri framboðsfréttir munu berast okkur.