Grímur Atlason skrifaði:
„„Það trúir enginn á Evrópu,“ er haft eftir Hilmari Veigari Péturssyni, forstjóra Fenris Creations, í Morgunblaðinu sem er í aldreifingu í dag. Í blaðinu er raunar vandfundinn einn einasti jákvæður punktur um Evrópusambandið. Það sýnir ágætlega hvernig staða frjálsrar fjölmiðlunar er landinu en það er önnur saga.
Hilmar Veigar heldur því fram að nýsköpun sé á fallandi fæti í ESB. Hann fer fjálglega með tölur og dregur meðal annars fram minnkandi hlutdeild ESB í heimshagkerfinu máli sínu til stuðnings. Vissulega er hlutdeild ESB í heimsframleiðslunni rúmlega þriðjungi minni en árið 2000, en það skýrist fyrst og fremst af gríðarlegum vexti Kína og Indlands. Hlutdeild Bandaríkjanna hefur á sama tíma minnkað um tæplega þriðjung og hlutdeild Bretlands sömuleiðis. Hlutdeild Kína hefur hins vegar nær þrefaldast og Indlands meira en tvöfaldast.
Þegar kemur að nýsköpun stenst málflutningur Hilmars Veigars illa skoðun.
Þegar kemur að nýsköpun stenst málflutningur Hilmars Veigars illa skoðun. Mörg ríki ESB standa afar framarlega á alþjóðlegum mælikvörðum um nýsköpun. Samkvæmt Global Innovation Index WIPO árið 2025 eru fjögur ESB-ríki meðal tíu öflugustu nýsköpunarríkja heims: Svíþjóð í 2. sæti, Finnland í 7., Holland í 8. og Danmörk í 9. sæti. Af 25 efstu ríkjunum eru 12 í ESB. Ísland er í 24. sæti – eitt ríkasta land heims, en greinilega ekki jafn duglegt á þessum vettvangi og til dæmis þegar kemur að stýrivöxtum.
Samkvæmt European Innovation Scoreboard hefur nýsköpunarframmistaða ESB aukist um 11,6% frá 2019. Mörg ríki sambandsins þykja til fyrirmyndar þegar kemur að nýsköpun og umhverfi rannsókna og þróunar. Danmörk er til dæmis í 9. sæti á lista WIPO og í 2. sæti innan ESB samkvæmt European Innovation Scoreboard. Danmörk er aðeins í kringum 114. sæti heims hvað mannfjölda varðar, sem sýnir ágætlega að stærð þjóðar ræður ekki úrslitum um nýsköpun. Þekkingar- og hátækniiðnaður hefur enda verið mikilvægur drifkraftur dansks hagvaxtar.
Það þýðir ekki að Evrópa eigi ekki við nein vandamál að stríða þegar kemur að nýsköpun. Helsti munurinn á Bandaríkjunum og ESB liggur ekki endilega í getunni til að skapa nýjar hugmyndir heldur í getunni til að stækka nýsköpunarfyrirtæki hratt. Evrópa hefur t.d. ekki skapað stafræna risa á borð við Amazon, Meta, Apple og Google og bandarísk fyrirtæki hafa mun greiðari aðgang að áhættufjármagni og stórum, samþættum fjármagnsmarkaði. Það er raunveruleg áskorun sem Evrópa þarf að takast á við. En það er allt önnur fullyrðing en að nýsköpun í Evrópusambandinu sé á fallandi fæti. Og það má raunar deila um hvort geta fyrirtækja til að verða svo stór og markaðsráðandi sem bandarísku tæknirisarnir séu óyggjandi mælikvarði á heilbrigt nýsköpunarumhverfi.“
Grein Gríms er fengin af Facebook.
