Hæðist að Samfylkingunni og Viðreisn

Það er hins veg­ar hvim­leiður kæk­ur og derringslegur.

„Það er ekki óþekkt að flokk­ar til­kynni að þessi eða hinn flokk­ur­inn sé úti­lokaður til sam­starfs. Það er hins veg­ar hvim­leiður kæk­ur og derringslegur. Helst er að skilja slíkt tal svo, að sá flokk­ur sem út­hýst er, sé óra­langt fyr­ir neðan virðingu þess sem hef­ur komið sér upp þessu af­brigði af einelti,“ stendur í Reykjavíkurbréfi Davíðs þessa helgina.

„Sam­fylk­ing­in, syst­ur­flokk­ur Viðreisn­ar, til­kynnti á loka­spretti þingstarf­anna að tveir flokk­ar væru úti­lokaðir til sam­starfs af henn­ar hálfu. Þetta var sér­stak­lega at­hygl­is­vert, því að fram að því hafði hvergi komið fram að nokk­ur væri að sækj­ast sér­stak­lega eft­ir sam­starfi við Sam­fylk­ingu,“ skrifar forsætisráðherrann fyrrverandi.

Eng­inn flokk­ur á við þá al­var­legt er­indi.

„Enda óljóst eft­ir hverju er þar að slægj­ast. Reynd­ar hátt­ar svo til um syst­ur­flokk­ana tvo, að þeir hafa aðeins eitt mál í sínu farteski hvor. Og svo vill til að það er sama málið, þannig að syst­ur­flokk­arn­ir tveir eru aðeins sam­an­lagt með eitt mál til að leggja í púkk með öðrum flokk­um. Þetta mál snýst um að leggj­ast til fóta hjá ESB og varla nokk­ur sála með viti hér á landi, og má senni­lega hafa heim­inn und­ir, sér­stak­lega að viðra sig und­ir banda­lagið það,“ skrifar Davíð.

„Ekki er vitað hvað syst­ur­flokk­un­um geng­ur til, en svo að getið sé í eyður vilja þeir sjálfsagt tryggja að í framtíðar veirukrísu geti eng­inn séð um kaup á bólu­efni nema ESB. Það gekk svo æðis­lega síðast. Stóri frétt­næmi at­b­urður­inn að öðru leyti um þetta sam­band er að það gengu nærri 70 millj­ón­ir manna úr því á einu bretti og vegn­ar svo miklu bet­ur eft­ir en áður. All­ar spár um ógn og skelf­ingu gufuðu upp eins og dögg fyr­ir sólu dag­inn eft­ir að út­gang­an gekk í gildi. Og þó gerði hið frá­skilda sam­band allt sem það gat til að gera út­göng­una erfiða, sem það hafði eng­an rétt til að gera,“ skrifar Davíð.

Og svo þetta: „Vand­inn fyr­ir slíka úti­lok­un­ar­flokka er að þeir fá ekki að njóta sinn­ar óskamm­feilni og síns derr­ings, þegar svo hátt­ar til að eng­inn flokk­ur á við þá al­var­legt er­indi, enda það eina sem þeir hafa að bjóða er löngu komið út yfir síðasta sölu­dag, súrt og kekkj­ótt.“