Alþingi: Karl Gauti Hjaltason, þingmaður Miðflokksins, kvaddi sér hljóðs á Alþingi núna rétt áðan.
„Fyrr í haust barst mér svar hæstvirts umhverfis-, orku- og loftslagsráðherra þar sem ég spurði hver væru útgjöld íslenska ríkisins til loftslagsmála. Ég hef áður greint frá því hér í þessum ræðustól hverjar þessar fjárhæðir eru en þær munu vera 28.000 milljónir á hverju ári næstu fjögur árin. Þetta eru engir smáaurar og því eðlilegt að spyrja hvaða árangri þetta hafi skilað. Það kom einnig fram að á undanförnum átta árum hafa árlega runnið 18.000 milljónir árlega til loftslagsmála. Í því samhengi er einnig eðlilegt að spyrja hvert allir þessir fjármunir hafa runnið. Nú hef ég fengið óvæntan liðsauka þar sem er háttvirtur formaður atvinnuveganefndar sem fékk svar við fyrirspurn sinni í síðustu viku þar sem hann spurðist fyrir um hvaða aðilar hafi fengið greiðslu eða stuðning til aðgerða í loftslagsmálum á árunum 2023 og 2024. Svarið sem barst fól í sér upptalningu á nokkrum fjölda aðila, einkaaðila, einkafyrirtækja, samtaka, opinberra aðila, opinberra stofnana og samtökum slíkra stofnana og einnig hversu mikið fé þessir aðilar fengu í styrki til aðgerða í loftslagsmálum,“ sagði Karl Gauti Hjaltason og sagði næst:
„Það sem vakti athygli mína, frú forseti, í þessu svari sem háttvirtur formaður atvinnuveganefndar fékk í síðustu viku var að þar var upptalning sem fól í sér niðurstöðutölu upp á 782 milljónir annað árið og 524 milljónir seinna árið, 2024 en samkvæmt mínu svari þá kostuðu loftslagsaðgerðir undanfarin ár 18.000 milljónir árlega síðustu átta árin. Þannig að svar þetta sem barst í síðustu viku innifelur einungis í sér 2% annars vegar og 3% hins vegar af þessari upphæð. Ég spyr þess vegna: Hvert rann afgangurinn af þessu fé, þessum 18.000 milljónum? Við þurfum greinilega, ég og háttvirtur. formaður atvinnuveganefndar, að leita betur eftir svörum við þessu.“
