Alþingi „Eitt af því sem þarf til þess að við getum haldið uppi hagvexti hér er að þau fjölmörgu nýsköpunarfyrirtæki sem bíða í startholunum fái þá orku sem þau þurfa,“ sagði Sigmundur Davíð Gunnlaugsson forsætisráðherra, á Alþingi í dag, þegar hann ræddi fyrir orð sín um samband virkjana og launahækkanna. Hann vitnaði orðrétt í sjálfan sig og sagði:
„Ég er einfaldlega að segja að ef menn ætla að semja um verulegar launahækkanir þá þarf aukna verðmætasköpun í landinu til þess að þær launahækkanir skili sér í auknum kaupmætti, annars fara þær fyrir lítið og brenna upp í verðbólgu.“
Hann sagðist ítrekað hafa haldið þessu fram en neitaði að hafa haldið því fram að verið væri að ræða rammaáætlun í kjaraviðræðunum. „Ég hef einfaldlega bent á þá augljósu staðreynd að ef verulegar launahækkanir eiga að skila sér í raunverulegri kaupmáttaraukningu þá þarf aukna verðmætasköpun í landinu.“
Hegli Hjörvar spurði ráðherrann hvort hann væri því ekki sammála og hvort hann væri ekki tilbúinn til að leggja sín lóð á vogarskálarnar til að auka sáttina, bæði í þinginu og í samfélaginu, með því að setja hér á dagskrá þau brýnu framfaramál sem hans eigin ráðherra, Eygló Harðardóttir, hefur unnið að þrotlaust síðastliðin tvö ár og enn eru ekki komin fram í þinginu en eru miklu þarfari en þessar deilur og líklegri til að skila okkur sameiginlegum árangri, virðulegur forsætisráðherra.
„…félagsmálaráðherra er tilbúin til þess að laga þau mál að þeirri niðurstöðu sem kann að verða í viðræðum um kjarasamninga þannig að húsnæðismálin eða breytingar þar á verði til þess að styrkja stöðu heimilanna, verði til þess að rétta hlut heimilanna enn frekar en leiði ekki til neikvæðra aukaverkana, þ.e. við þurfum í heildarniðurstöðunni, hvort sem er í húsnæðismálum eða kjaramálum í heild, að huga að því að afraksturinn skili sér til heimilanna,“ sagði Sigmundur Davíð Gunnlaugsson að lokum.
