„Reikna má með að starfsfólk og stéttarfélög þeirra nái vopnum sínum smám saman, andmæli við uppsögnum verði háværari og skipulagsbreytingar á sviðum Borgarinnar geti orðið erfiðari en er nú í Ráðhúsinu – og haft eftirmála.“
Haukur Arnþórsson.
RVK: Allir flokkarnir þrír, sem mynda nýja meirihlutann í höfuðborginni, vilja eigna sér þær aðgerðir sem þegar hefur verið gripið til með uppsögnum starfsfólks.
Á sama tíma eru boðaðar frekari uppsagnir. 40 prósentum starfsmanna verður sagt upp, að sagt er. Starfsfólk hlýtur að skjálfa á beinunum vegna nagandi óvissu um hvert verður næst.
Bágt er að trúa að svo margt starfsfólks séu ónytjungar hjá borginni.
Haukur Arnþórsson stjórnsýslufræðingur hefur tjáð sig um máiið:
Hann segir ástæðurnar bæði pólitískar og faglegar. „Pólitískar að því leyti að nánasta samstarfsfólki fráfarandi borgarstjórnar var sagt upp, fólkinu sem unnið hefur við upplýsingamál og stefnumótunarmál á æðsta plani Borgarinnar – væntanlega verður eitthvert skipulag myndað til að endurvekja með nýju nafni hluta af þeim störfum – og faglegar af því að verið er að breyta starfsemi borgarinnar í takt við það sem samstarfssáttmáli borgarstjórnarflokkanna gerir ráð fyrir – og taka á offramboði opinberrar þjónustu (hugtak sem ég skýri ekki núna), sem er eða ætti að vera aðalatriðið,“ segir Haukur.
Hann spáir því að frekari skipulagsbreytingar verði erfiðar:
„Reikna má með að starfsfólk og stéttarfélög þeirra nái vopnum sínum smám saman, andmæli við uppsögnum verði háværari og skipulagsbreytingar á sviðum Borgarinnar geti orðið erfiðari en er nú í Ráðhúsinu – og haft eftirmála.“
Enn sem komið er er helsta mál nýja meirihlutans uppsagnir starfsfólks.
