…ef undan eru skilin dæmi um tvær konur, sem hann neitaði að bugta sig fyrir, önnur þá í embætti dómsmálaráðherra af hálfu Sjálfstæðisflokks og hin borgarfulltrúi Miðflokksins.
Jón Örn Marinósson skrifar:
Ekki veit ég betur en að fari gott orð af samstarfi við eða starfi undir stjórn Stefáns Eiríkssonar ef undan eru skilin dæmi um tvær konur, sem hann neitaði að bugta sig fyrir, önnur þá í embætti dómsmálaráðherra af hálfu Sjálfstæðisflokks og hin borgarfulltrúi Miðflokksins. Ég hef svo sem enga ástæðu til að ætla annað en að Stefán eigi eftir að valda því vel að gegna stöðu útvarpsstjóra á umbrotatímum í sögu Ríkisútvarpsins á næstu árum. Sjálfsagt er ráðning Stefáns þóknanleg bæði Sjálfstæðis- og Framsóknarflokki en að óreyndu tel ég enga ástæðu til að gagnrýna samhljóða ákvörðun stjórnar Ríkisútvarpsins af þeim sökum. Við skulum bara vona að stjórnin hafi vandað sig vel við „huglægt mat“ á umsækjendum svo að skattborgarar lendi ekki í því að þurfa að greiða nokkrum vel menntuðum og hæfileikaríkum konum laun útvarpsstjóra í eitt og hálft ár.