Kristrún Frostadóttir forsætisráðherra skrifaði:
Ísland og Færeyjar eiga sérstakt samband. Og ég vil beita mér fyrir því að við styrkjum tengslin við okkar góðu nágrannaríki í Norður-Atlantshafi. Enda var þetta fyrsta opinbera vinnuheimsókn mín sem forsætisráðherra.
Ég varði sunnudegi með Akseli V. Johannesen lögmanni. Við ræddum margháttað samstarf Íslands og Færeyja á sviði menningar, viðskipta og stjórnmála – og ýmis tækifæri til að efla sambandið enn frekar. Þess á milli kynntum við okkur vernd umhverfis og þjóðminja á eynni Koltur og fylgdumst svo með karlalandsliði Færeyja í handbolta vinna frækinn sigur á Úkraínumönnum. Daginn áður flutti ég ræðu sem formaður Samfylkingar á landsfundi hjá Javnaðarflokkinum sem er flokkur Aksels.
Og það var aldeilis ekki amaleg byrjun á afmælisdeginum í gær að fara í jarðgangaskoðun. Fór meðal annars í „Eysturoyartunnilin“ svokallaða þar sem er neðansjávarhringtorg. Það er alveg magnað hvað Færeyingar hafa staðið vel í uppbyggingu samgönguinnviða á síðustu árum. Og veitir innblástur. Það er einmitt eitt af aðaláherslumálum nýrrar ríkisstjórnar að byrja aftur að bora jarðgöng á Íslandi.
Ég kynnti mér einnig auðlindastefnu Færeyinga. Þar er breið pólitísk sátt um almenn auðlindagjöld – svo sem í sjávarútvegi og fiskeldi – og það var fróðlegt að heimsækja Bakkafrost sem er eitt stærsta og öflugasta fiskeldisfyrirtæki í heimi.
Að lokum fundaði ég með leiðtogum Danmerkur, Færeyja, Grænlands og Noregs um stöðu öryggis- og varnarmála í Norður-Atlantshafi. Það var virkilega góður fundur og mikill samhljómur. Ég vil að Ísland taki virkan þátt og veiti forystu í öryggis- og varnarsamstarfi í okkar nærumhverfi. Það gerum við best með því að þétta raðirnar og auka samstarfið við önnur ríki á svæðinu.
Takk fyrir mig, Færeyjar!