Þetta var hefndaraðgerð gagnvart öryrkjum!
Björgvin Guðmundsson skrifar:
Stjórnvöld hafa haft 26 milljarða af öryrkjum vegna krónu móti krónu skerðingar fyrir utan afleiddar afleiðingar þessarar skerðingar. Þessi krónu móti krónu skerðing skerðir kjör öryrkja um 12 milljarða á ári eða um 24 milljarða á 2 árum. Skerðingin hefur staðið í 2 ár og tæpa 2 mánuði. Það bætist því við kjaraskerðing í 2 mánuði í viðbót eða um 2 milljarðar.
Almenningur virðist ekki gera sér grein fyrir því hvað alvarlegt mál er hér um að ræða: Það er búið að níðast á öryrkjum í rúm 2 ár í þessu máli. Öryrkjar hafa verið sviknir um það í rúm 2 ár að fá afnám krónu móti krónu skerðingar, einungis vegna þess að þeir hafa ekki verið tilbúnir að samþykkja starfsgetumat!
Haustið 2016 lofaði ríkisstjórn Sigurðar Inga að afnema krónu móti krónu skerðingu hjá öryrkjum. Sjálfstæðisflokkurinn átti aðild að þeirri stjórn ásamt Framsókn. Á síðustu stundu hætti þessi ríkisstjórn við að afnema krónu móti krónu skerðingu hjá öryrkjum vegna þess að öryrkjar voru ekki tilbúnir til þess að samþykkja starfsgetumat.
M.ö.o. Þetta var hefndaraðgerð gagnvart öryrkjum! Um áramótin 2016/2017 var því lofað af þessi skerðing gagnvart öryrkjum yrði mjög fljótlega afnumin. Það var svikið og þau svik hafa staðið þar til í dag. Flokkur KJ lýsti yfir stuðningi við afnám krónu móti krónu skerðingar gagnvart öryrkjum haustið 2016. En sá flokkur hefur einnig snúið baki við öryrkjum og stendur nú með BB og Sigurði Inga. Framkoma þessara aðila við öryrkja er til skammar.