Hildur Sverrisdóttir, þingflokksformaður Sjálfstæðisflokksins, er ekki búin að gera sér nægan mat úr málum tengdum, Ásthildi Lóu Þórsdóttur. Hildur sagði á þingi fyrr í dag:
„Hæstvirtur forsætisráðherra fullyrti hér í pontu Alþingis í gær að það hafi engin ósk um trúnað komið inn í forsætisráðuneytið hvað varðar það mál að upplýsingum var komið á framfæri um þáverandi barna- og menntamálaráðherra. Það stangast á við afdráttarlausar fullyrðingar uppljóstrarans í málinu. Báðar geta ekki verið að segja satt. Raunar sagði hæstvirtur forsætisráðherra einnig hér í pontu að það kæmi fram í birtri tímalínu ráðuneytisins að engin ósk um trúnað hefði komið inn í forsætisráðuneytið. Það er sannarlega rangt. Það kemur hvergi fram í þeim gögnum sem ráðuneytið birti. Í þingræðisríkjum er eitt það alvarlegasta sem gerist ef ráðherra segir þinginu ekki satt. Ég veit ekki hvað er satt og rétt í þessu, virðulegi forseti, en ég tel brýnt að forseti hlutist til um að hæstv. forsætisráðherra hafi tækifæri sem fyrst til að skýra betur þessa stöðu gagnvart þinginu.“
